يتيمة واعرف خمسيني وأحبه حب بريء ( تعديل العنوان)

[مشكلتي]

السلام عليكم ..
حبيت اطرح مشكلتي عندكم لاني احس ابي المساعده ... وما اروم اخبر اي حد هالسالفه
انا يتيمه ابوي وامي متوفين يوم كان عمري 10 الحين انا عمري 22
المهم .. متعرفه ع ريال معرس عنده عيال .. وبناته بعمري واكبر مني بعد
هو عمره جريب الخمسين

المهم انا احبه حب بريء واحسبه معوضني عن حنان الاب والاهتمام وكل شي
يخاف عليه وكله يسال عني يومياَ كل ساعه تقريبا .. سواء ب اتصال او واتساب
ومايخليني بروحي مول
حتى اذا قلت له بسير الجمعيه اتشرى ايي الجمعيه ويتم يراقبني من بعيد
دومه ينصحني ويحذرني من ربيعاتي ومن شباب الجامعه وغيره .. وانا احتاج منهو ينصحني لانه ماعندي حد..
الريال وايد محترم.. بعمره ماغلط

انا قبل ما اعرفه كنت اتعرف ع شباب وايد وماكنت افكر هاييل الشباب شو يبون بالمختصر كنت ضااااايعه !! لكن عقب ماعرفته واايد اتغيرت حسيت انه انا لي جيمه .. وتحجبت والحمدلله

المهم .. من يومين تقريباَ حرمته شافت فونه , وقرت محادثتنا اللي فالواتسب .. كنت كاتبه له شو سويت فالجامعه وكله اكتب له بابا , ابويه وكذا .. المهم هو دوم يقول لحرمته بعرس عليج وبعرس عليج ف خلاها ف شك دايما , ف يوم قرت محادثتنا اللي فالواتسب وانا اكتب له بابا وبابا شكت اني انا صدق بنته وانه هو معرس عليها !

المهم , اتصلت بي حرمته مارديت , وكلمتني ع الواتسب .. قالت لي انتي منو وانتي منو .. قلت لها عفواَ انتي اللي ترمسيني منو انتي !!!!!!! وعقب خبرت الريال بالسالفه ... قالي قوليلها انتي فلان بو فلان , هي بتخاف وبتصكج بلوك.. وانا مشيت ع شوره وقلت لها اني انا بو فلان ..

وصكتني بلوك ..

لكن الحين !!!!!! انا سببت مشاكل بينهم.. والريال بهالعمر له احترامه واحس اني طيحته من عين حرمته وانا
انا وربي وايد اعزه وما ابا له المضره .. احس اني متلومه فيه وفيها وكله اصيح ما اعرف شو اسوي ..
ما اقدر اخليه لاني بحس بالفراغ .. وبرد حق سوالفي الاوليه .. وبنفس الوقت ما ابا اخرب بيته ...

شو تنصحوني اسوي

الله يستر علينا جميع.....

المزيد من آخر المواضيع من نفس القسم:

• كرهت حياتي
• مطلقة و اريد اعيش لحالي
• مشكلتي الفراغ
• مضغوطه وفقدت الامل
• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

تمت الموافقة
الكلمة الطيبة صـــدقة

[سماءالأفق]

يا الله ....أنت حبيبتي نيتك طيبه لكن الشرع ما فيه إن ريال غريب يكون مثل بابا حتي لو فارق العمر يستدعي
هذا الشعور ,,والحين فعلا يا قلبي حرمته في عذاب وشك,,اتركي كلامك معه واقتربي من الله وماراح تردين لسوالفك ,تقوي علي الفتن بالإيمان بالله,
ويارب يرزقك بزوج صالح قريب من عمرك ويكون حنووون عليك وطيب ويحبك.

[تناهيد جرح]

وعليكم السلام والرحمه

حبيبتي أنا أعرف أنج محتاجه لهالمشاعر ولقيتيها عنده وتعتبرينه كأب بس يا عيوني هالشي غلط الريال مب محرم لج يعتبر اجنبي وحرام تكلمينه ..

اشغلي وقتج باشياء ثانيه وتقربي من الله وادعي الله يرزقج بالزوج الصالح اللي يعوضج
ويكون لج اب وزوج واخ
وتذكري ان الانسان مسؤول عنه وقته

الله يصلحج ويهديج ويرزقج بالزوج الصالح يارب

[مالتيزرس]

حبيبي الله يرضى عليج ابتعدي عن هالدرب لانه حرام فحرام ..والشيطان موجود ممكن يجرج للغلط ..ومابني على باطل فهو على باطل ..اختي مافي شي اسمه اذا تركته اخاف ارد للضياع ..في شي اسمه وازع ديني وخوف من الله ..وينج عن الصلاة والقياام الليل والاستغفار..وواحد كبر ابوججج شو تبين فيه ..انتي صغيرة والعمر جدامج .بييج اللي تبينه .اش لج تبلشين عمرج مع واحد شيبة وتيبين منه عيال يعني فرضا لو تزوجيتي ويبتي منه عيال بيكون عمر الولد 10 سنوات وهو كم راح يوصل 60 او 70 تقدرين باجر تتحملين مسوؤليتهم طبعا زمننا مثل ماتشوفينه صعب هو طبعا بيكون شيبة يالله يشل عمره وين بيروم يربي عيال ويسنعهم ..لاتفكرين باليوم فكري فالمستقبل ..يمكن بعدج صغيرة ومب جايفة الدنيا ..
انا أكلمج كلام واقعي وماريد أجاملج يعني شوفي فرق للعمر ..هو اكيد هدفه الزواج ..لو انتي اختي جان هالشكل نصحتها..وماللج فدمار وخرااب البيوت حرااام تشتتين عييلة وتكوني سبب طلاق عيلة دام زواجها سنين قبل لاتنولدين ..هذا شكله عايش مراهقة بياخذ اللي يبيه ويبا يتشبب شكله وعقب صدقيني بيرد لبيته ..

[مالتيزرس]

حبيبي الله يرضى عليج ابتعدي عن هالدرب لانه حرام فحرام ..والشيطان موجود ممكن يجرج للغلط ..ومابني على باطل فهو على باطل ..اختي مافي شي اسمه اذا تركته اخاف ارد للضياع ..في شي اسمه وازع ديني وخوف من الله ..وينج عن الصلاة والقياام الليل والاستغفار..وواحد كبر ابوججج شو تبين فيه ..انتي صغيرة والعمر جدامج .بييج اللي تبينه .اش لج تبلشين عمرج مع واحد شيبة وتيبين منه عيال يعني فرضا لو تزوجيتي ويبتي منه عيال بيكون عمر الولد 10 سنوات وهو كم راح يوصل 60 او 70 تقدرين باجر تتحملين مسوؤليتهم طبعا زمننا مثل ماتشوفينه صعب هو طبعا بيكون شيبة يالله يشل عمره وين بيروم يربي عيال ويسنعهم ..لاتفكرين باليوم فكري فالمستقبل ..يمكن بعدج صغيرة ومب جايفة الدنيا ..
انا أكلمج كلام واقعي وماريد أجاملج يعني شوفي فرق للعمر ..هو اكيد هدفه الزواج ..لو انتي اختي جان هالشكل نصحتها..وماللج فدمار وخرااب البيوت حرااام تشتتين عييلة وتكوني سبب طلاق عيلة دام زواجها سنين قبل لاتنولدين ..هذا شكله عايش مراهقة بياخذ اللي يبيه ويبا يتشبب شكله وعقب صدقيني بيرد لبيته ..

سمحيلي استملتج اشوي بس لاني ابا مصلحتج وماباج تكوني فريسة وباجر تتزوجين وتتلعوزين فحياتج وياه لانه مثل ماقلتي عنده حرمة وعيال فسننج وماظنتي بيخلونج فحالج دام متعلقين فأبوهم ..
انتي مالج اخوان خوات حبيبتي اقعدي معاهم اتسلي ..يعني بروحج ساكنه ؟؟!!
الله يحفظج حبيبتي واييسر امرج ويصلحج ..

[عيووووون]

والله مب رايده اقسي عليج بالكلااام ولا حتى اقول شي يمكن يضايقج
شي كبير فقد الابو والام ولما كتبتي انا يتيمه ومحتاجه مساعده كان ودي اول شي اسوي اضمج
بما انج كتبتي انتي حاسه ان شي غلط تسويه ومحتاجه توجيه فانتي واعيه بالغلط ومحتاجه تتراجعي فيه
نيتج محتاجه اهتمام بس طريقه اللي اخترتيها حرااام ومهما كان الوضع سوا كلمتي شباب قبل واللحين متعلقه بخمسيني هي مجرد غلطه وبتروح من حياتج

اللي تسويه بلوك ع رقم الريال وابدي من جديد بدون اي شي يغضب رب العالمين
خلي هاجسج الوحيد كيف اتخرج واكون مستقبلي واكون ناجحه واخلاقي عاليه الكل يتمناني خلج صعبه المنال
وعرفي اي شي حرااام اخرتهااا ندم ونوح ودموع
فتلاحقي على نفسج واستغفري وتوبي وطوي الماضي باجر بتقولي الحمدلله اني انتبهت لنفسي وتلاحقت عليهااا
ضبط النفس مب محتاجه ام واب لا والله محتاجه صحبه صالحه
غيري صحبج اول شي تسويه واذا انتي عند عمتج او خالتج عايشه عندهم خليهااا عايلتج وتاقلمي معاهم لا تكوني وحيده وتحسسي نفسج بالضعف ومالي حد
شكلهااا جامعتكم مختلطه حاولي لا تعطي حد مجال وانتبهي لنفسج

وهالمنتدي ترا اجواءه عايليه بتستانسي فيه دخليه في وقت فراغج ،،، مارسي هوايتج ،،، لا تخلي عندج وقت فراغ ابدااا ،، بحيث لما اتيي على فراشج من التعب تحطي راسج وتنامي ما عندج وقت للعب فالفون والسوالف


والله ينور بصيرتج ويهديج يا رب ويبعد عنج كل شي يضرج 🌹

[ام مصطفى..]

الله يرزقج الزوج الصالح ان شاءالله

[ماحد شراتي]

حياتي حياتي حياتي

لا فديتج ابتعدي عن هالدرب .. اعرف انج دورين الحب والاهتمام ومن حقج بس هالدرب غلط ونهايته صعبه .. حاولي تتعرفين على بنات من عمرج .. ويا منو عايشه ؟ محد من عمرج ؟

ربي يوفقج ويستر عليج

[Yazi.90]

حبيبي الله يرضى عليج ابتعدي عن هالدرب لانه حرام فحرام ..والشيطان موجود ممكن يجرج للغلط ..ومابني على باطل فهو على باطل ..اختي مافي شي اسمه اذا تركته اخاف ارد للضياع ..في شي اسمه وازع ديني وخوف من الله ..وينج عن الصلاة والقياام الليل والاستغفار..وواحد كبر ابوججج شو تبين فيه ..انتي صغيرة والعمر جدامج .بييج اللي تبينه .اش لج تبلشين عمرج مع واحد شيبة وتيبين منه عيال يعني فرضا لو تزوجيتي ويبتي منه عيال بيكون عمر الولد 10 سنوات وهو كم راح يوصل 60 او 70 تقدرين باجر تتحملين مسوؤليتهم طبعا زمننا مثل ماتشوفينه صعب هو طبعا بيكون شيبة يالله يشل عمره وين بيروم يربي عيال ويسنعهم ..لاتفكرين باليوم فكري فالمستقبل ..يمكن بعدج صغيرة ومب جايفة الدنيا ..
انا أكلمج كلام واقعي وماريد أجاملج يعني شوفي فرق للعمر ..هو اكيد هدفه الزواج ..لو انتي اختي جان هالشكل نصحتها..وماللج فدمار وخرااب البيوت حرااام تشتتين عييلة وتكوني سبب طلاق عيلة دام زواجها سنين قبل لاتنولدين ..هذا شكله عايش مراهقة بياخذ اللي يبيه ويبا يتشبب شكله وعقب صدقيني بيرد لبيته ..

كفت ووفت ما شاءالله عليها
وربي يرحم والدينج و يرحم اموات المسلمين حبيبتي،

[ريم العسووله]

عزيزتي انتي ما ذكرتي في رسالتج بأنج عايشة مع منو عقب ما توفوا امج و ابوج ... منو المسؤول عنج من هذاك الوقت و رباج ؟

عالعموم حبيبتي الرجل يبقى رجل و الانثى تبقى انثى مهما كان العمر بينهم ... و مهما كانت المسميات و المصطلحات الرسمية بينهم ... و الاهم من هذا كله الحرام يبقى حرام عسى الله يهدينا و يهديج ...

انتي بعدج صغيرة و بإذن الله راح يي لج نصج الثاني في يوم من الايام ... هالانسان متزوج و كبير بالسن و عنده بنات قدج ... حطي نفسج مكانهم و تخيلي ابوج يتواصل مع وحدة قد بنته !!!

ما في شيء اسمه حب بريء بين رجل و مرأة غريبين عن بعضهم البعض ... لا تبررين حق نفسج الي تسوينه... ولا تبررين انج اذا هديتيه راح ترجعين للشباب !! شو هالكلام الله يهديج ؟! تحمين نفسج و تحافظين على نفسج من العلاقات الحرام بعلاقة حرام !!؟؟

عزيزتي ... اقطعي الشر و انهي العلاقة الي بينج و بينه دام الموضوع وصل لهالحد ... و لا تزيدين النار حطب و تطيحين الريال من عيون زوجته و بناته عقب هالعمر و العشرة ... دامه هو قال لج قولي لزوجتي انج ابو فلان ... هاي معناته ان الريال ما يبي يخرب بيته ... انتي تنظرين له على انه ابوج و لكن ما تعرفين هو كيف ينظر لج !!... و شيء طبيعي ريال بعمره يمر بما يسمى بمرحلة المراهقة المتأخرة لا تستبعدين هالشيء... و انتي لو فكرتي و سألتي نفسج شو نهاية هالعلاقة بتحتارين ... لان ما لها نهاية ... لا يصلح يصير زوجج و لا راح يصير ابوج ... ليش تضيعين نفسج و وقتج بعلاقة غريبة محرمة ... فكري عدل الله يوفقج ...

[mrs.abk]

فديتج انتي تبين تعوضين عاطفة فقدج لأبوج معاه .. ما عليه فديتج ابوج راح الله يرحمه ومحد يعوضج عنه .. وانتي اليوم كبرتي .. 22 سنة ما عدتي ياهل .. امشي في الحياة بدون تعاطف من حد وربي بيرزقج زوج يعوضج عن كل ما مضى

[بنت الشوامخ]

حبيبتي اتركي هالدرب لانه يغضب رب العالمين
واللي يمشي بهالدرب راح يتعب ويعيش بعذاب نفسي
حرام الريال مستقر مع حرمته لا تتسببين من بينهم مشاكل
والريال كبير شو له بهالسوالف الله يهديه
المفروض هو ينصحج تقطعون الاتصال مابينكم ويجابل بيته وحرمته وعياله

يعني اذا ودرتوا بعض راح ترجعين لسوالفج
ليش اختي

نسيتي رب العالمين فوق يراقب مهما كانت ظروفج واللي تمرين فيه
لاتروحين لدرب الحرام ولا راح تندمين ندم

ادعي ربج ربي يرزقج بالزوج الصالح وهو اللي راح يعوضج بإذن الله عن حنان وحب الوالدين
تعرفي على ربيعات واشغلي نفسج بأمور مفيده
اهتمي في دراستج لو تدرسين او دوري وظيفه لو ماتداومين

بس نصيحه اتركي هالريال
وحطي نفسج بوضع الحرمه اكيد ماراح ترضينها على عمرج لو كنتي معرسه ولو كان حب بريء

[ورقة ناعمة]

الرجل يمكن مايشوف عياله ومب مهتم فيهم فليش بيحسبج بنته ,,,

ابتعدي كل الرياييل يوم يبغون الفريسة يهتمون ويدللون ويغارون ويراقبون عشان يحصل اللي يباه

[تفاحتي]

الله يهديج
عذرج اقبح من ذنبج
يعني يوم بيحاسبج ربج بتقولين والله انا يتيمه

ع الاقل انتي احسن من اللي انولدو بالاصل يتامى ولا شافو ام ولا اب غير بقايا اهل الوالدين



حبي فجي عينج ولا تصدقين الشايب المراهق مرده بيكشر عن انيابه لان حتى لو كان الريال نظيف الشيطان ف الارض