لا معنى لحياتي

[مشكلتي]

عمري 23 سنة و متزوجة وعندي ولد عمره سنه و شهرين
ابغي حل لمشكلتي لأنه زواجي في ضياع و زواجي بيتدمر.

في بداية زواجنا كنا متعلقين ف بعضنا وايد وكان يموت فيني وانا الحمدلله ماينقصني جمال ودلال وهو دايم يخاف اني اودره او انه يفقدني.

بس عقب يوم الله كتب لي و حملت تغير ريلي وايد قام يشرب و يسهر و يطلع ومرات يبات فالبيت
و ما يصرف علي و طول الوقت يقولي بطلقج و ابا افتك منج و حياتي وياج جهنم و ما اطيق اشوفج جدامي وما قمت اسمع منه غير هالكلمات الي تجرح وتعور القلب وهذا غير الضرب.

وللعلم تره كانت بيني و بين اهله وايد مشاكل والسبة انهم يبونه يطلقني وياخذ بنت عمه واللي لاهو يباها ولا هي تباه.
وهو ماكان يبا المشاكل في حياته ويحاول يرمس اهله وياما حاول وما فاد
وفوق هذا كم مرة طردوني من البيت ولكني ارد واقول مابا مشاكل واتسامح واراضيهم ومع انه ارضاءهم غاية لاتدرك ومايعجبهم شي ابد . بس بعد فوق هذا اقول يله بستحمل وهاي حياتي ولازم استحمل.

ويوم قربت اربي تغير اكثر واكثر وانا شكيت خلاص ووصلت لفكرة والشيطان لعب بمخي والفكرة اني افتش فونه وفتشت فونه قلت اكيد وراه شي وصدقت

اكتشفت انه ريلي يخوني من اول يوم من زواجنا ويا وحده اجنبية مب بس وياها ويا اكثر من وحدة ولا وفوق هذا يزني وياهن ويسهر ويصرف عليهن ويسكنهن فنادق
وانا كنت ساكتة واتريا الفرصة وبس بين فترة وفترة اذكره بأنه لي حقوق ولازم يعطيني ولكن للاسف كان مايعطيني شي وكان ابوي يطرشلي مصروف لانه اهله مابغو يصرفون علي.

وماسكت عنه عقب الربى خبرته انه 1 2 3 انته مسوي وانا عرفت كل شي وانصدم ويلست اصيح له وقلتله اذا ماتباني وتبا هاييل طلقني وخلاص.

ولكن شفت التجاهل منه وضحك في ويهي ضحكة خبيثة وقالي خلاص انسي اللي صار والحين انا عندي ولد يعني بتغير وابا دعواتج وكنه كان يتمصخر علي .

وترك اللي كان يرمسهن وغير رقمه ولكن مستحيل يغير حساباته و رد يتعرف ويرمس بنات وانا لين اليوم فتشت فونه اكثر من 20 مرة صح انها خصوصيات لكن كنت احاتي ابا اعرف سيراته ومنو يرمس وشو يسوي ويقهربي هالشي بس غصب اسويه عسبت اعرف يصرف ع منو واجيك ع تطور العلاقات واخذ كل شي عندي دليل عليه بدون سبب وما اواجهه انه مثلا صرف ع فلانه وطرش حق فلانه او تصور ويا هاي ولا سار المكان الفلاني ويا هاذيك.

من يوم صارحته تغير اكثر تغير وايد وايد
وقام اذا يبات برع البيت يبات يوم كامل وفالاسبوع اكثر من مرة يطلع ولا يعبرني ولا يتصل الا اذا بغى شي ويرد البيت وويوم ايي اشوف علامة ع رقبته وعلامات ع جسمه واحترق واصيح واحط بخاطري وما اقول شي وانجرح حيل منه من افعاله
وتره من خلصت النفاس العلاقة الشرعية بيننا شبه معدومة فالشهر مرتين او ثلاث
واذا بغاها ياني ياخذ بالغصب
وما قام يطلعني من البيت بس يسلمني المصروف ويقولي اي شي ناقص بييبه وهو اللي يتشرالي الناقص واذا بيوديني مكان ماله غير المستشفى ولا الجمعية.

واهله تغيرو عقب مايبت ولدي تعلقو فيني وايد وحبوني بس بعد شي مشاكل ما انتهت وبعدها معلقة بيني وبينهم بس الحمدلله احسن عن قبل لكن انا وهو حالنا كل يوم اسوأ من قبل .

دومه عصبي ومتنرفز ويعق علي الفاظ تجرح ويمد ايده علي ويهددني بالطلاق وانا اقول يمكن السبب اسلوبي وياه ويمكن ما انتبه للي اقوله وبعد فوق هذا ماعندي خبره فالزواج وعقب اسير واتأسف اذا غلطت مع اني قبل ماكنت اطيع اقول اسفة وغلطت ولكن الحين صرت اسكت واي شي اغلط فيه اقوله اسفة ولكن قام يتمادى يعني ما قام يحترمني ولا قام يسويلي قدر ومكانة ولا يحشمني جدام حد واذا انا مابغيت ابين للناس انه بيني وبينه شي مستوي هو يحاول يبينه غصب.

مرتين بس قالي بنطلع وسرت وياه ومن اطلع وياه قامت الطلعات تستوي فيها مشاكل ويدور الزلة علي ويحاول بأي طريقة ينبش بأي شي عسبت يردني البيت ويهددني بالضرب فالبيت. وقمت ما اداني اطلع وكلما تضايجت وقلتله ابا اطلع اتمشى اغير رايي عقب ما اتذكر هو كيف يعاملني يوم نطلع لدرجة اني اسير وياه المولات او الاسواق و ويهي يبين عليه اني كنت اصيح ومضايجة.

ومن فترة قالي انا ابا اتزوج عليج وشي وحده فبالي وانصدمت وتعبت وايد لين اكتشفت انه عندي الضغط.

والحين خواتي واقسم بالله احس بضياع ماشي استقرار ولا شي أمان ومشاكل طول اليوم والوقت ووضعه الزفت من شرب وبنات ماتغير و ماقمت اثق فيه واخاف واصيح يوم يغصبني فالعلاقة الشرعية

وقمت اكرهه ولا اطيق شوفته او قربه واحس انه مب لي ومالي حق فيه. وكنه بس شريك في فراشي وفي كبتي واغراضي وبس .

قمت ماداني الجماع وياه واخاف بيني وبين نفسي اقول يارب ما اييني مرض جنسي منه واحس انه راعي امراض وفوق هذا الانهيار اللي اييني يوم اشوفه جدامي وكله علامات وكلما ايي اسأله اقول بقلبي انا اللي خليته يسوي جي ويوصل كل شي بينا هالدرجه.ومع اني مب السبب وعارفه.

تعبت واحس يتني حالة نفسية ماقمت اطلع ما قمت احب الناس وماقمت احب اتجمل ولا اثق فيه او فحد من اهله وما اعرف شو الحل
اواجه واحل مشاكلي ولا اسكت واصبر ولا اطلب الطلاق ما اعرف بالضبط شو الي اباه احس بس اني ضايعه واني محتاية حد يشور علي وانا ما قدرت اخبر حد من اهلي او من اهله او اني اسير اسأل اربيعاتي وغيره.

ماعرف شو اقول وما اعرف شو الي كتبته هني والله اني افضفض واشكيلكم من القهر والضيق الي فيني. وآسفة لأني طولت عليكم

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

تمت الموافقة
لاحول ولاقوة إلا بالله
أسأل الله أن يجعل لج فرج ومخرج ويكتب لج الخير
ويرده لج ردا جميلا يارب

[تفاحتي]

ماعرف
بس لو انتي صدق متاكده انه ع علاقات محرمه


انفذي بجلدج
لاتقعدين معاااااه لا يوصخ دمج والا اييب لج جرثومه

ليش انتي ضعيفه لهدرجه عيوز ؟! مريضه ؟! خذاج فيج عاهه ؟! ماعندج اهل



طبيه ما تبينه
الله ما يرضى حكمه الرجم حتى الموت
ودام ما عندنا القصاص

قصيه روحج بالطلاق

والله يعوضج

[المعآني]

ردي بيت اهلج هذا ماينفع زوج
المفروض من البداية كنتي حاسمة وماسمحتي له يقلل قدرج
جمعي الأدلة كلها خشيها بعيد عنه في مكان آمن
عسب لو حصل طلاق تثبتين انه ماله أحقية في الولد ومايقدر يأخذه عنج وقوي شخصيتج وعطيه أكبر طاف انتي للأسف كبرتي راسه لو وحدة ثانية جان تركته هو وبنات الحرام وشافت حياتها وخليه الله بيجازيه على أفعاله وأنه ضيع اهله وولده واستبدل الحلال بالحرام


بيت اهلج انتي و ولدج خذيه من هالجو تراه إمانة

[مس جوتشي]

الله يعينج اختي مافي حد يستحمل الي استحملتيه

[بنت الشوامخ]

استغفر الله
انا عادة مول ما انصح بالطلاق
بس هذا الانسان سكير يشرب الله يعلم اذا يصلي او لا ؟؟؟ و عنده علاقات توصل للزنا ومصخره وعلامات عالجسم قمة الوقاحه

اختي المفروض تخافين على عمرج من الامراض والالتهابات الخطيره

وين اهلج
اكيد بيت اهلج احسن مليون مره من هالعيشه


شوفي عطيه هذه الفرصه وبس
هدديه انج تبين الطلاق لانه هذه مب حياااه
خيريه مابين الطلاق او انه يتغير ويصطلب لو يباج

ولاحظت اختي انه شخصيتج جدامه ضعيفه
يعني تتأسفين له وهو غلطان و ماتتكلمين يوم تشوفين العلامات وتنقهرين وسكتي عنه مده لين بالنفاس صارحتيه عن علاقاته والاخس من هذا كله يمد ايده عليج وسكتي وماخبرتي اهلج الرياييل عشان يكسرون ايده ولا يتجرأ ، خلاص الحين تأخرتي واكيد بيتمادى

شوفي اختي لازم تقوين شخصيتج
خلج حازمه قويه تصارحينه بكل شي في قلبج ولا اتمين ساكته وتنقهرين واييج الهم والغم وانتي بعدج بعز شبابج

واكشخي وتعدلي لعمرج مب عشانه وخليه يشوفج احلى عن هالخايسات ونفس الوقت لاتعطينه ويه وردي على قد سؤاله خلج رسميه وياه وانشغلي بعمرج و ولدج وبيني له انج ماراح تموتين بدونه

يمكن يتحرقص ويباج تعطينه ويه وبيتم يركض وراج
لانه شي رياييل يحبون الغموض والشي الصعب
ولما تحسينه قام يركض وراج استمري بهالطريقه

يمكن ان شاء الله عقب شوي شوي راح يترك هالعلاقات ويعقل

اذا ماتغير فخليه يسرح ويمرح في علاقاته وانتي شلي ولدج و روحي بيت اهلج وكل حد يروح بحاله جي احسن لج ولولدج
والحمدلله بينكم بس طفل واحد مب اكثر

[سماءالأفق]

يارب يعوض عليك عوض جميل

[Yazi.90]

انا مثل كلام اختي اللي فوق
لو كنتي متأكده ان له علاقات محرمه هذا ماتقعدين عنده دقيقه وحده
وانتي بعد قوي شخصيتج لا تمين بس تصيحين،
لازم تتخذين موقف بخصوص هاللي يسويه المصارحه والكلام معاه ماينفع
لان اللي قاعد يسويه اعوذ بالله من الكبائر،
سيري بيت اهلج ولا تردين له لين مايترك هالمنكر، ماقول غير الله يهديه

عليج بسورة البقره اقريها يومياً والله انها فرج من الكرب والضيق
و صلي قيام الليل وادعي ربج واستغفري وان شاءالله يتغير ويهتدي،

الله يفرج همج ان شاءالله ❤️

[الطواشة]

حبيبتي اتقولين خايفة من المرض ..

يزني .. يشرب .. يخون .. مقصر ماديا
و بعد عنده بالغصب .. و ما يطلعج برع
و لا بعد يضرب

مافي شي ايجاببي ذكرتيه 😖
و صارحتج ان ما يبلعج و تامه بعد ..

كراااامتج وينننننن ؟؟


انتي مجرررد زوجه اصلا ما يحبج 👊
اذا واجهتيه و استغل هالشي بعد ما جافج عرفتي
خلاص مصخها قام بالاسبوع يغييب ..

قلتي ابوج يطرش مصروف . 👍
الحمدلله 💕

لا تمييين دقيقه عنده .. 💔
لا تقولين احبه و اموت فيه

هذا ما ينحب 😷
وصاخه و قذارة 👎

اختيه الدنيا ما بتوقف عليه .. ودريه يمعي الادلة و لا تواجهينه فيه ودي عند الوالد .. و طلبي الطلاق .

[mouzan7mod]

عندي سؤال : تحبين تمرضين بالإيدز او الهربس ؟
اختي العلاقات تسوي أمراض الله يعافينا و يبعدنا عنها
مب هو دوم يهددج بالطلاق؟ خلاص اطلبي الطلاق
اولا اعتقد انه ما يصلي لآنه يشرب و يسهر و يخربط ف وين وقت الصلاة بحياته ؟؟؟
ثانيا ما يصرف عليج و ما عاطنج حقج الشرعي ولا يعرف عنج الا أول الشهر حق الأغراض و رغباته
اتمنى تدورين على شغل و تعتمدين على نفسج و تربين ولدج بروحج .. أفضل من العذاب النفسي

[ladygaga love]

عورني قلبي عليج حبيبتي لا تبني سعادتج على ريال او شخص خلي يولي بستين داهيه ودامه يسوي الحرام لا تقتربين منه دوريلج شغل واصرفي على نفسج والاحسن سيري بيت اهلج ولبسيه خليه يحس بغلطته

[Mitha1212]

انصحج تستشيرين موجهه اسري ,,
و بعد حاولي تشغلين نفسج ب اي شي ,, داومي / ادرسي / اطلعي /روحي الجيم
لاتفكرين فيه ,, لاتناقشينه ,, ابتعدي عنه شوي
يعني خذي لج فترة نقاهه عشان ترومين تفكرين عدل

الله يوفقج

[سنفورهه]

الله يعينج اختي وييسر امورج ياارب
اتوقع ف هالحال ماشي غير الطلاق لان ماشي حل غير هاذا
دام ما ينفع شي معاه لا تضيعيين عمرج على واحد شراته والله يوفقج ان شاء الله ويسعدج

[عيووووون]

الله بيعوضج باللي احسن منه
اختي عمري ما انصح بابغض الحلال
بس في حالتج اقول
اليوم ضغط باجر مرض جنسي بعيد الشر عنج
عندج عيال فكري فيهم من بيربيهم اذا ابوهم جي نشأته اللهم لا شماته
زنا وعلااقات سهر وخيانات وقصور عاطفي ومادي اهانات وضرب وتجريح الخصوصيات مكشوفه يعني عادي عنده يطلع اسرار بيته وخمر والله العالم بعد شو الله يعينه على ما بتلاه
اذا العيال يشوفون هالشي قدامهم فانتي مسؤوله بيتربوا ع هالشي بعيدهم عن هالبيئه
اذا يبا يتزوج يروح !!ما رام ينفق على زوجته ويعطيها حقها يعني بيروم للثانيه

عزي نفسج وشوفوا عيالج وصحتج لعيالج اذا راحت صحتج محد بينفعج ولا ترخصي نفسج اكثر
طلاقج بضرر مب بطره ولا دلع انتي متضرره من كل النواحي وخايفه على عيالج
بيت ابوج مفتوح روحي عنده واطلبي حقوقج كامله والنفقه علي عياله
وهو له الله ان الله سريع العقاب
باجر لما يشوف نفسه بين مستشفى ومستشفى بيعرف ان الله حق والنعمه اللي كان فيها
هذا رائي خوفا عليج وعلى عيالج وفالنهايه هذا قرارج نحن بس نقول ارائنا نشوف الجوانب اللي انتي ما تشوفينهاونساعدج شوي بس فالنهايه انتي تقرري اللي تشوفيه يناسبج


انا اعرف ناس وايد تستشير بس اطبق اللي تشوفه يناسبها لان هي في جو نحن مب عايشينه نفس ما هي عايشتنه ومستحيل تسرد كل شي بكمن سطر هذي سنين مب يوم

والله يفرجها لج من اوسع ابوابه