مشكلتي مع ريلي حبيبي وابا المساعده منكم

[مشكلتي]

السلام عليكم ورحمة الله وبركاته

انا متزوجه من 7 شهور تقريبا وبعدني عذراء ( الحمدلله ) ,, لان زوجي يعاني من مشكله و خلال هالشهور كان يراجع ف 3 مستشفيات و ماشي فايده تذكر .. هو يباني وااايد بس ماايستوي الشي عنده

نفسيتي تعبانه ووايد افكر ,, انا بعدني صغيره عشرينيه ,,, ريلي يعاني من كذا مشكله صحية بس انا رااضيه الا عن هالنقطه وااايد احاتي وافكر و يوصل فيني التفكير اقول ( يمكن طول العمر نتم جي وما اييب عيال ف بتطلق ) ,, محد يعرف عن هالشي و تعبت ماعرف اقول ل منو ,, ومابا اقول لحد ,, كلهم يسالوني ما حملتي ماحملتي ,, وما اعرف شو ارد عليهم

انا احبه ,, احبه لان مب مقصر معاي ف شي ( الله يحفظه ) ,, و ما اقدر الومه على شي لان مب ب اييده ,, والله ماتخيل حياتي بدوونه



اللي اباه منكم شيئين :
1 - نصيحتكم لي و دعائكم
2- تخبروني عن مستشفيات او عيادات خااصه متخصصين و يكونون اوكيه عشان ريلي يتعالج ,, ما اقدر اسال حد لان بيسالون ليش لمنو



اتمنى عدم التجريح و شكرا

المزيد من آخر المواضيع من نفس القسم:

• كرهت حياتي
• مطلقة و اريد اعيش لحالي
• مشكلتي الفراغ
• مضغوطه وفقدت الامل
• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

تمت الموافقة

الكلمة الطية صـــدقة

[غلآ نفسي]

والله ماعرف اختي شو اقولج

الله يعينج ويعينه

[ماحد شراتي]

الله يشافيه ويعافيه يارب ويخليكم لبعض

ان شاءالله اهل الخبره بفيدونج

[sa7el]

والله أختي ماعرف بس حاولي لا تسكتين ولا تيأسين،،،

جربي كل شي
جاولوا تسافرون للعلاج برع

أهم شي لا تفكرين في الناس هاي حياتج انتي وريلج لا تهتمين في الناس،، خلاص سافروا محد عليه منكم ليش ووين مسافرين وحق شو،،، خلاص،،،
سيري وياه وكوني عون له

اسألوا عن احسن دولة لعلاج هالشي

ثانيا،، جربي الاعشاب والعسل والحجامة ،، سبحان الله ما تعرفين شو الله كاتب له
اصبري عليه،، ها ريلج

الله يوفقكم ويسعدكم يا رب

[Safooya_uae]

هلا حبيبتي
هالمواضيع حساسه جدا وافضل ما تتكلمين عنها قدام اهلج او اهله
بإذن الله بتنحل المشكلة ،،
اول خطوة الدعااااء قد ما تقدرين وخاصة في قيام الليل
وكثري من الاستغفار
ثاني شي كلمي ريلج وشوفي شو رايه بالعلاج ووين
المشكلة بالضبط وحاولو تقرون مع بعض حلول للمشكلة سواء كان بالتغذيه او غيره وتجربونها فتره مب يوم او يومين
عندج العسل و الزنجبيل وايد اوكي
نزلي برنامج اسمه الطبي في اب ستور ،،،
كتبي المشكلة هناك وبيردون عليج اطباء واكيد فيه مواضيع بشابة اقريها و ستفيدي

بالنسبة للمستشفيات و العيادات
دكتور وليد في مستشفى هيلث بلس في بوظبي
و دكتور فقيه عنده كذا فرع

[مس جوتشي]

اختي علي- بالاستغفار وان شاءالله بتعافى الله يعينج ان شاءالله

[مغليك]

الله يعافيه ويشافيه ياارب ..
اختي قبل التسافرون برع البلاد جوفي مستشفيات الدولة اول شي اذا هو فالجيش خليه يشوف مستشفى زايد العسكري وايد عندهم دكاترة واجانب وعندج م خليفة ..وعندج م برجيل بوظبي دكتور اسمه فاطمي من بلجيكي مب متاكدة بالضبط بعد يمدحونه يعالج العقم ..

اذااءا مشكلته دوالي ترا عادي يسوون لها عملية ..

وسمعت عن مركز فقيه سوي سيرج عنه

ثاني شي يمدحون بلجيكا دشي قسم المتاخرات عن الحمل وخذي لفه فيه تجمع الخوات مسوينه ..

ولا تنسين اختي تتوجهين لربج فقيام الليل انتي وريلج وادعون الله يفك كربتكم لاتستهين بهاللحظه اغتنميها حتى لوركعتين اخضعي لربج بالدعاء واستغفرو باثنينكم كل واحد يذكر الثاني ..
وتصدقو الصدقة لها اثر ..
خذو بالأسباب ..وخلو اموركم موكله ع ربج ..

وكلام الناس عقيه ورا ظهرج فديتج وللا راح تتعبين ..

الله يسعدكم ويرزقكم الذرية الصالحة ..

يالله عاد نبا البشارة ان شاءالله عقب كمن شهر .حطي املج بالله .

[Yazi.90]

الله يكون فعونج ان شاءالله،

و يسهل اموركم ياربي

[بنت الشوامخ]

الله يشافيه ويعافيه وابدا اختي ماله داعي تقولين حق حد عن مشكلة ريلج
تخيلي شعور ريلج لو عرف انج خبرتي حد عن هالمشكله
خاصة انه الله يخليه لج يحبج ومب مقصر وياج ويحبج ويباج

واذا سألوكم عن الحمل قولي مأجلين شوي و دعواتكم وبس ماله داعي التفاصيل

الحل عليج بالصبر ثم الصبر واحفظي سر ريلج وصدقيني كل هذا تؤجرين عليه
وتعاونينه في رحلة العلاج وتدورون احسن عيادات ولو تسافرون برع
مافي شي مستحيل ورب العالمين بيشافيه ويعافيه تفائلوا وتصدقوا بنية الشفاء

واذا تفكرين بالحمل حالياً جربوا اطفال الانابيت او تلقيح صناعي
والله يرزقكم من فضله

[بنت الشوامخ]

وخل ريلج يروح عند شيخ يرقيه احتياط اذا راح كم مكان ولا شي فايده من العلاج

[ام هزاع2013]

الله يرزقكم الذرية الصالحه ..

ليش ماصارحج من البدايه قبل العرس

[mouzan7mod]

اذا قالو لج ليش ما حملتي قولي مب مستعيلين
و حاولو تتعالجون بعيد عن امارتكم

[مغليك]

كلام بنت الشوامخ عين العقل ..
وع الناس قوليلهم مأجلين سالفة الحمال مخلينها على الله يوم الله بيريد لنا وبيكتب وماعليج منهم فديتج ياما تكلمو علينا يوم تاخر حملي انا ومرت حمييي تمينا يمكن سنة ومرت حميي من 7 سنوات ماالله رزقها ..فانتي خلي املج بالله وحده حبيبتي ..ولاتقعدي تجرحينه لانه اللي فيه مكفينه ولاتعلمي اهلج ..

[ورقة ناعمة]

اختى في حريم تبحث وتسير وتسافر بس عشان تحصل علاج وتحافظ على بيتها

ولكن بالكتمان من قالج ان مافي وحدة من هالحريم ماعندهم مشكله نفس مشكلتج في وايدات بس

يسترون على نفسهم وعلى بيتهم لانهم حابين الشخص وعارفين هذا مب بايده

ونحن بزمن السرعة والتطور وكل شي له حل بس بالصبر

والله اعرف وحده تمت 8 سنوات لين تعالج ريلها والسبب ان ريلها كان رافض العلاج

انتي دام ريلج يبغي يتعالج في امل كبير وان شاء الله ما تتم سنة الا وتعالجت الأمور


كثري استغفار وصدقة ودعاء والله قريب بعباده

نصيحة لج لاتخبرين لا قريب ولا شخص تامنينه اقضوا حوائجكم بالكتمان