تعبت سنين

[مشكلتي]

أنا بنت وعمري 17 ونص أكبر وحده من بين خواتي
هاي آخر سنة لي ف الثانويه والحمدلله ف القسم العلمي ومتفوقه
أمي جداً سلبية معاي لدرجه فظيعه ، ويا كل حد ف البيت
محاضرات ما تتوقف، تدور الزله دايماً، ما تشوف الجوانب الايجابيه أبداً
نحن ما عدنا خدامة ف البيت، وامي ما تطبخ لنا أبداً، دايماً ناكل من المطاعم
هي تشتكي منا وتقول أنه نحن ما نحس فيها،
يعني أنا شو ذنبي إذا راجعه من المدرسه وتعبانه واسمع نفس الاسطوانه
ما شكيت لها همي ، لانه دايماً تقولي انا اللي فيني يكفيني، انزين يمكن انا تعبت؟

يعني إذا من يستوي الصبح لين ف الليل ما ارقد
ولا اكلم حد من ربيعاتي ولا اسوي شي ترفيهي اصلاً
بس اجابل كتبي
ما احس انه لي حد ف هالدنيا،
ولا مرة في حياتي وانا ادرس امي دخلت علي ويابت لي شي آكله
دايماً انا اسوي العشا والريوق
وزني نزل بشكل فظيع

أتريا اي حد يخطبني عشان اطلع من البيت، ادري ان الزواج مسؤوليه لكن اللي مريت فيه يأهلني اني اصبر

مره قلت للبنات من مواقفي ويا امي، البنات انصدموا وقالوا لي سوي لج كتاب اسمه البنت البائسه
ضحكت بس كنت مكسوره ، امثل جدامهم اني بخير واضحك، لكن انا ما اصدق اسير المدرسه بس عشان انسى البيت

قمت احس انه امي بس تتكلم وما تهز فيني ولا شعرة لاني مليت من كلامها
ما قمت أتأثر و صرت بارده بشكل كبير

ساعدوني، قولوا لي شو أسوي، تعبت وايد
ما في فايدة أني اصارحها واكلمها لانها بتطلعني غلط حتى لو هي كانت غلطانه

المزيد من آخر المواضيع من نفس القسم:

• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت
• ريلي احبه ،، بس ماعرف شو الي حصل
• مشكلتي التعلق الزائد
• رفض ريلي للحمل
• عااااجل مشكلة واجهتني

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المراقبة العامة]

تمت الموافقة
الكلمة الطيبة صدقة

[المعآني]

الغالية تقولين امج ماعندها خدامة
وما شا الله البيت فيه اهله هاييل يبالهم تنظيف وراهم وترتيب و غسل ثياب وغيره
انا عندي طفل واحد وما ألحق ع الشغل وحالتي حالة واطبخ مرتين يمكن بالأسبوع ويمكن لا
الأم لو تعرفين شو تحملت جان يلستي تحبين ريولها وهي تنازعج
الحمل روحه تعبه يكبر الواحد عشر سنين
انا قبل الحمل كنت طيبة ومالي حس
عقب ولدي اعترف اني صرت وايد عصبية من الضغط والمسؤوليات
جربي سوي شغلها أسبوع وجوفي نفسيتج كيف بتصير
الدراسة مب عذر عسب ماتساعدينها
حاولي ترتبين وقتج وتخصصين وقت تشيلين الشغل عنها
اضغطي عمرج شوي و أن هي قالت لج شي قولي لها حبيبتي يا ماما
قولي لها الكلام الحسن واحسني لها الواحد مايعرف أمه كم ب تعيش بري فيها ولا تقصرين بحقها
الله أعلم شو الظرف اللى تمر فيه لأن محد يحب يكون سيء
لكن اكيد في أمور خلتها جيه
اصنعي سعادتج وخصصي وقت تساعدين فيه الوالدة بتشوفين البركة ب وقتج ودراستج واصبري عليه أتم هي اللى ربتج وتحملت واااااايد عشانج وما بتعرفين هالشي إلا يوم تصيرين ام

[nayla79]

عورت قلبي امج...كوني الها وعشانها مب عليها كوني سند الها وتحمليها

[Beau Sancy]

شوفي انتي من مجرد شي بسيط تعبتي والحياه بعدها جدامج ومب من باب اني اخوفج
بس بعدج ماشفتي شي من الحياه .. لكن امج عندها مسؤوليه كبيره عيال وزوج
والزواج بروحه اصلا يهد الحيل .. انتي بعدج صغيره يمكن ماتفهمين كلامي بس عقب بتعرفين شو اقصد
وان نار اهلج احسن من جنه زوجج .. عمره الزواج ماكان حل لاي مشكله تواجهج

امج صارحتج وقالت وقفو معاي ، انتي ماتدرين شو من مشاكل وهموم هي تمر بها !
ماتدرين شو الاشياء اللي انتو ماتعرفونها وهي ماتخبركم عشان ما تضايق بكم
لازم تكونين عون وسند لها وتوقفين معاها ، تريقي معاها يلسي معاها
دخلي عليها بورد وكلام حلو ولا تترين شي فالمقابل ، لان هاي امج !
الام شي عظيم وشي كبير وشي مقدس !

ولا تتشكين حق ربيعاتج محد بينفعج ! اشكي لرب الناس ..
ربج اللي ممكن يغير حالج ويساعدج ، ادعي انه يحنن قلب امج عليكم ويقربكم من بعض

وعسى الله يريح بالج

[Um Mahra24]

الله يعينج حبيبتي حاسه فيج خاصة ها العمر البنت تحتاج امها وياها حاولي تتقربين منها بالكلام الحلو اعرف ان الدراسة شيء صعب بس ماعليه شدي حيلج هاي اخر سنه وربي يوفقج وخصصي لنفسج وقت تسوين فيه شيء يسلي اي شيء غيري روتين حياتج والله نفسيتج بترتاح وحبيبي حاولي تيلسين وَيَا أمج سولفي وياها سوي اي شيء وياها انتي عايشه وياها 17 سنه تعرفين شو تحب وشو ما تحب مثلا بهديه ب بوسة بحظن والله يهديها يارب

[غلآ نفسي]

انا حاسه فيج

بس لو تزوجتي عقب فتره من الزواج بتدورين امج دواره خصوصا اذا يبتي عيال

حتى لو كنتي عايشه ب نعيم بتقولين وينها امي

اسألي المجرب فديتج

انتي حاولي معاها بالطيب ما تعرفين بشو مرت امج ومستحيل ام تقول لبنتها عن مشاكلها وضغوطاتها

نحن الحين امهات وعارفين الوضع كيف


مستحيل وحده بعمرج او ما جربت الامومه تفهم سلوك امج


ييبو خدامه ع الاقل عشان تساعدون بعض


واذا ع اكل المطاعم ترا اغلبنا ياكل من اكل المطاعم

بالتوفيق

[رسايل غلا]

أحس البعض فهم كلامج غلط لكن حبيبتي انتي بعدج صغيرة ويمكن بروحج ما تقدرين ترمسين أمج أو تناقشينها بهالخصوص, لازم حد أكبر عنج يرمسها ويحاول يخليها تقرب منكم أكثر وتفهم احتياجاتكم
المسئولية تشمل الكل صح انها أم وتحتاج ترتاح أحيانا لكن هذا واجبها اللي فرضه عليها رب العالمين مب شي تسويه يوم وتخليه عشر أيام!
انتوا بعدكم في سن تحتاجون فيه تكونون قراب من أمكم وتكونون حوالينها وهي حوالينكم, وبالرغم من هذا المسئولية مش بس طبخ ولبس وتنظيف انتي كبيرة وفي سن تقدرين فيه تساعدينها عقب ما تخلصين دراسة ويكون عندج وقت خلال اليوم, خلي حد قريب منكم يرمس وياها بهدوء وانتي بعد حتى لو هالشي صعب عليج
حاولي اكثر من مرة تيلسين وياها ورمسيها بحب وقوليلها: انتي تاج راسي وحبيبتي ووجودج ويانا يخلينا نحس بالراحة, الأكل من ايدج عجيب يوم تسوينه يكون له نكهة لذيذة, نحن ما نقدر نعيش بدونج وكل شي تبينه مني بساعدج فيه كثر ما اقدر.
كل ما كان كلامج مليان بالحب والاهتمام هي بتحس فيج وبتهتم لكلامج ويتحسن الحال بإذن الله.

[الساحرة]

سبحان الله ، تقبلين تشلين البيت ع راسج من تنظيف و طباخ لزوج المستقبل الي تتريينه لكن ما تقبلين تسوين هالاشياء لامج ، انا ما اقول ان وضعج عادي ، لا انا في مكانج يمكن بيكون صعب علي لكن لسبب هو اني كسوله و تعودت ان فيه حد يخدمني

و لا اقول ان امج وضعها بعد عادي ، هي مقصره فحقج لأن مهما كان المفروض تهتم ع الاقل بموضوع الاكل !

لكن مهما قصرت كوني متأكده انها الاكيد في السنوات الي طافن بذلت جهد كبييييير في حياتها عشانكم لدرجة انها تعبت و اجهدت ماصارت تقدر على شغل البيت نهائيا ،

[sa7el]

عادي اختي ما قلتي شي نحن ما مرينا فيه،، بالذات امج تشوفج انتي العودة وعلى باب العرس وتحس انج بعدج صغيرة عشان جي كل وقت محاضرات،، عشان باجر يوم تعرسين ترفعين راسج وراسها

مثلا انتي تسوين لج عشا وريوق صح؟؟
انزين،، وين خواتج اللي اصغر منج؟ هم شو ياكلون؟

ملابسج مال المرسة منو يغسلها ويكويها وملابس البيت؟
حجرتج منو يرتب لج اياها

عالعموم،،، باجر جربي يوم بتسوين لج عشا،، سوي عشا للبيت،،، لامج وابوج واخوانج وخواتج
والريوق لو امج تكون واعية حتى لو راقدة سوي لها ريوق وحطي لها ريوقها جاهز

من تين من المدرسة يلسي سولفي وياها خبريها سوالف المدرسة شو صار وما صار

[~شوق~]

الله يهدي ما في النفوس ويقربكم لبعض..
تراها الا فتره وبتعدي على خيرر.. إن شاء الله. .
إن مع العسر يسرا

سبحان الله وبحمده سبحان الله العظيم

[almal3ka1]

الا امج

احترميها و لا تراددينها


ركزي عدراستج


شو ما تقول ان شا الله , حتى لو ما عيبج


سويلج جو روحج


بعد الله يعينها امج , شاله البيت شل

[Yazi.90]

انا حاسه فيج

بس لو تزوجتي عقب فتره من الزواج بتدورين امج دواره خصوصا اذا يبتي عيال

حتى لو كنتي عايشه ب نعيم بتقولين وينها امي

اسألي المجرب فديتج

انتي حاولي معاها بالطيب ما تعرفين بشو مرت امج ومستحيل ام تقول لبنتها عن مشاكلها وضغوطاتها

نحن الحين امهات وعارفين الوضع كيف


مستحيل وحده بعمرج او ما جربت الامومه تفهم سلوك امج


ييبو خدامه ع الاقل عشان تساعدون بعض


واذا ع اكل المطاعم ترا اغلبنا ياكل من اكل المطاعم

بالتوفيق

اختي صاحبة الموضوع خلج واثقه وعلى يقين بكلام العضوات
لان اغلبنا هني متزوجات وعندنا عيال ونعرف شو تحس فيه امج!
التمسي لها العذر روحج تقولين ماعندكم خدامه يعني هي وين تلحق مسكينه
نحن عندنا بيت صغير وطفلين او 3 ونصيح من التعب لو ماعندنا خدامه ،،

[madmozel_shayma]

اولا لا تزعلين ولا تضايقين ما فيه بيت يخلئ من المشاكل و هذي الدنيا لو خليت لخربت .. لكن البيوت اسرار و المفروض ما تكلمين ربيعاتج عن مشاكلج الشخصية الا اذا وحده تثقين فيها لنه الناس هالايام همها نفسها وبس و فيه ناس تشمت بدال ما تقدم النصيحة
نصيحتي لج تتقربين من رب العالمين و تطولين فالسجود و يوميا تختمين جزء من القرآن و صدقيني الله بيسر امورج وعن تجربة و كثري من الاستغفار و دايما انظري للناس الي اقل منج وقولي الحمد لله .. فالنهاية مافيه حد مرتاح
و اذا شفتي النقاش مع امج ما يفيد حاولي تتجنبينها اذا كانت معصبة لنه هالمشاكل تأثر فالشخص اذا التفتلها وايد و تاثر علي شخصيته مستقبلا وانتي ف سن مراهقه بعدج صغيرة عمرجج 17 وانا يوم كنت بعمرج كنت حساسة وايد وهالشي طبيعي فهالعمر
لا تكبرين المسائل هونيها و بتهون والله
ولا تتحرين الزواج حل لهالمشاكل بالعكس ممكن حياتج ف بيت اهلج اهون من الزواج ..فكري ف مستقبلج فكري ف اي تخصص بتدخلين و كيف تكونين متفوقه فالدراسة
فالنهاية محد بينفعج غير شهادتج و مستقبلج و هذي المشاكل بتكون مجرد ذكريات و بتضحكين عليها
الله يوفقج يارب و ييسر امورج و يفك كربج و جميع المكروبين

[cute uae]

شوفي انتي من مجرد شي بسيط تعبتي والحياه بعدها جدامج ومب من باب اني اخوفج
بس بعدج ماشفتي شي من الحياه .. لكن امج عندها مسؤوليه كبيره عيال وزوج
والزواج بروحه اصلا يهد الحيل .. انتي بعدج صغيره يمكن ماتفهمين كلامي بس عقب بتعرفين شو اقصد
وان نار اهلج احسن من جنه زوجج .. عمره الزواج ماكان حل لاي مشكله تواجهج

امج صارحتج وقالت وقفو معاي ، انتي ماتدرين شو من مشاكل وهموم هي تمر بها !
ماتدرين شو الاشياء اللي انتو ماتعرفونها وهي ماتخبركم عشان ما تضايق بكم
لازم تكونين عون وسند لها وتوقفين معاها ، تريقي معاها يلسي معاها
دخلي عليها بورد وكلام حلو ولا تترين شي فالمقابل ، لان هاي امج !
الام شي عظيم وشي كبير وشي مقدس !

ولا تتشكين حق ربيعاتج محد بينفعج ! اشكي لرب الناس ..
ربج اللي ممكن يغير حالج ويساعدج ، ادعي انه يحنن قلب امج عليكم ويقربكم من بعض

وعسى الله يريح بالج