من يحمي الموظـف ؟! " رفعت قضيـه " وللاسف

**نهار الظباء** · 2015-05-24, 21:10

اول شي طبيعة شغلي اني اداوم بـ جهه حكوميه كـ مدخل بيانات ، تقدرون تقولون كونتر ومااقدر اشرح اكثر ، وبكتب لكن قصتي او بالاحرى "قضيـتي "

توقعت ان سير القضيه بيكون بشكل ثاني وبشكل صارم ولكن للاسف :

السالفه .،
فـ اول دوام بعد العيد تاريخ 7/ اكتوبر/2014 ..
كنت مب مداومه ، و دقوا لي عشان اداوم .،

ع الـ 12 الظهر ، دخلت وحده معصبه ، وتبى معامله معينه ، فـ قلت لها اوراقج ناقصه ، قالت اوراقي داخل عند المسؤل ، قلت لها لازم تيبينها هني تمت تصارخ " اهو يطرشني عندج وانتي تطرشيني عنده شو هالحركات "
قلت لها "سمحيلي " وكملت معاملة الريال اللي عندي والمراجعين يلوس حوالي 15 شخص بس للاسف اغلبهم مب عرب .،

قالت " يعني مابتخلصيني" قلت لها " يبي لاوراق" تمت ( تسـب ) ! وانا منصدمه

قالت : " انا اصلا يوم شفتك تنكدت ياضاله يافاسقه ... الخ " "انا مواطنه وانا وانا و المفروض تخلصيني بحكم اني بنت لبلاد " وكلام ثاني الواحد يستحي يقوله ، و الغريب كملت تسب باللهجه ******..

توج مواطنه يابنت لبلاد !!!

حاولت اتصل بالشرطه وهي موجوده شردت .، وادعت ان عندها اطفال فالسياره !

رحت للي مناوب ، قلت له " عطني بيانات المراجعه الفلانيه لاني بفتح بلاغ فالشرطه "
رد علي " ماعندي والله بس لحقيها اخذي رقم سيارتها و بلغي عليها عن طريق رقم السياره "

و يحلف ان ماعنده بياناتها !

استبعدت لان مستحيل يعرف شو نوع المعامله اللي تحتاجها بدون لايفتح النظام مستحيل يطرشها لي بدون مايكون عرف هويتها وشو طلبها بالضبط

وتميت مستبعده ومب مصدقه كلامه !

طلعت وراها وكانت سياره لونها رصاصي من نوع كامري ، خذت رقم السياره بس للاسف ماخذت الفئه اللهم خذت لون اللوحه وطافتتي الفئه شافتني اخذ رقم السياره ، فـ هو شرد و هي ركبت تاكسي وشردت !

وعلى بالهم انهم افلحوا !!

كلمت جهة عملي ع اساس بفتح بلاغ ، توقعت بينفتح البلاغ عن طريقهم و شفت برود مابعده برود ، ويبوني اتسامح ..

والصراحه حاولت اطنش واسامح ماقدرت .. لان كنت احس ان حجم الاهانه كان كبير ، ولو كان السب بيني وبينها بروحنا مب مشكله لكن سبتني قدام المراجعين

المهم رحت مركز الشرطه بـ رقم السياره

قالي الضابط " المشكله ماعندج بيانات الشخص كيف نفتح البلاغ و البلاغات ضد مجهول لو كانت بسيطه تنحفظ ، هاتي بيانات و على هالخشم "

قلت له : " من وين لي ببياناتها ، ماعرفها واول مره اشوفها "

قالي : " مصيرها بتراجعكم وين بتروح"

طلعت من عنده مقهوره ، لان ماظنتي ترد تراجعنا ، واساسا لو طاف ع الواقعه 3 شهور ، يسقط حق تقديم الشكوى كنت خايفه من هالشي

ومن القهر ليلتها ما قدرت ارقد وعزمت اني بشتكي بشتكي .، وبطلعها بطلّعها ..

ع فكره هي مب اول مراجع يعترض ويعصب ، الكل يعصب وانا اقدرهم بس هي الوحيده اللي تمادت فالاعتراض و وصلته للقذف والسب .،

ملاحظه :
موضوعي ليس اعتراض لا على حكم ولا دستور ولا قضاء ، ولكن تنبيه للكل في امور بخبركم عنها خلال الموضوع ، ونفس الوقت ابا السالفه
توصل .،

يتبع .،

المزيد من آخر المواضيع من نفس القسم:

**اشراقة أمل** · 2015-05-24, 21:45

اختي هو الاحترام احترام بغض النظر عن الجنسية انا مابي اذكر قصه صارت لي .. وكنت انا مراجعه والموظف كان يعامل المراجعين بأسلوب سيء

ويقول لهم اطلعوا من المكان ... اذا متاخرين ومب عاجبكم ...! فضطريت اشد بالكلام يمكن طلعت مني كلمه! بس موقف كان سيء بالنسبه لي

انا مريضه واستنى لي ساعات !!!

بس بعدين حسيت بتعذيب الضمير ... وهو اعتذر وقال انه غلطان بس صار يسبني ! يعني رد لي الصاع بالمسبه! هههههههه

فخلاص هو حر! عوض

بس يمكن في موقفك .... المشكله مب سوء أسلوب منك .. بل هي تهجمت

لي ربيعه مره سبها مراجع! قال لها يانجسه! واسفه على الكلمه!

ثاني يوم حاول يتسامح منها هي ماتكلمت ولا حد تكلم من الموجودين وهو يسب بها!

بس مارضت وراح ..!!!

في موقف ثاني كان واحد يشتغل في موقع وسبه صاحب المكان ... راح رفع عليه قضيه عن طريق الشركه ...ومشت الأمور وتاسف صاحب المبنى!

يعني

حسب الأشخاص! في أماكن عمل ترفض الرد على العميل!!! وفي أماكن توافق

بس اختي من الأفضل لا تذكري الجنسيه بس قولي جنسيه أخرى! عشان الجنسيات فيها الشين والزين عادي

انا مره رد علي مراجع من المحكمة وانا اشتغل ويخانق ويصارخ سكت عنها! اخر شي مر علي يسلم يقول لي كيفك عمو مع سلامه سامحينا!

فتصير اختي

**Yazi.90** · 2015-05-24, 21:47

بقول كلمة حق بصراحه ولا تزعلين مني ،،
صدقه الريال كيف يتم فتح بلاغ دام ماعندج معلومات عنها
و المشكله يعني ولا اي معلومه !
بس مستغربه كيف الموظف ماطاع يخبرج عن بياناتها ،،
انزين اصلا شو مصلحته يتستر عليها ؟
هي غلطت وتستاهل اللي اييها لان قالت كلام ماينقال
لو مكانج يمكن كنت ارجع للريال المناوب واحاول فيه يعطيني معلوماتها
والله اختي انا تخيلت نفسي مكانج صدق والله قويه ف حقي ،،
ومستحيل اني اسامحها لانها هانتني جدام الكل وقللت من احترامي ،،
ماقول الا حسبي الله ونعم الوكيل ،،

**الوردة الجورية** · 2015-05-24, 21:48

الله يعينكم على المراجعين اللي ماعندهم ذوق و احترام في التعامل

الموظف اللي شرد شكله يعرفها عدل وخاف من الفضايح

بس لو طنشتيها وقلت آسفة خلي موظف ثاني يكمل لج شغلج
انتي مب ملزومة تخلصين لها معاملة بعد ما هانتج وسبتج

وحتى لو ماتعرفين بياناتها في كاميرات تبين كل شي!!!

**اشراقة أمل** · 2015-05-24, 21:53

فعادي اختي .. انا اعرف ربيعه لي تشتغل في مكان ... مطلوب منها ان ماترد على أي مراجع مهما كان ! مره واحد قال لها يادبه!

ماردت عليه! ثاني يوم شرى لها ترضيه علبة حلويات ! واعتذر والحمدلله على كل حال!

بس مفروض تحصلون بياناتها عندكم والمسؤول يتصل عليها ويشد عليها ياتمر تعتذر امام الجميع .... يابيبلغ عليها!

بس مثل ماقلت حسب قانون المكان ...

**اشراقة أمل** · 2015-05-24, 22:04

ومرات حسب المصلحه يعني مثلا انت موظف على قدك .. سويت بلبله او تريد تشتكي على مراجع ذو مصلحه عندهم! يدبسونك بقضيه ويتهمونك

بالاهمال عشان خاطر المراجع الكبير!! من بيوقف معاك! مافي حد! حتى القانون مايوقف في وجه التلاعب اذا صار عشان بيكون محكم نوعا ما

ويمكرون ويمكر الله والله خير الماكرين

فمافي عدل عند الناس العدل فوق بس اختي .

**نهار الظباء** · 2015-05-24, 22:04

جـزء 2

(سبحان الله يوم تصرّ ع شي يتحقق لك)

انا تميت افكر ، واغلب تفكيري انه طالما ان حق الشكوى مكفول للجميع سواء ببيانات او بدون ، المفروض ان المركز ياخذون شكواي , حتى لو كانت ضد مجهول .، وللنيابه حرية التصرف في حفظ القضيه او النظر فيهاا

بعد الواقعه بـ كمن يوم وبعد الصلاه دعيت عليها من خاطري ، ومن عقبها دخلت ع نظام الشكاوي والاراء التابع لوزارة الداخليه و فـ موقع الوزاره ، كتبت اعتراض او شكوى عالمركز ، انهم ماخذوا البلاغ ،

طبعا نظام الشكاوى معروف ان استجابتهم سريعه وياخذون الشكاوى ومايتاخرون فـ الرد واعتقد خاطبوا المركز بضرورة تحرير البلاغ

والحمدلله بفضل الله ثاني يوم اتصلبي مدير المركز عشان اراجعهم .،

رحت لهم وخذوا البلاغ هالمره ضد مجهول وخذوا مني رقم السياره وظهرن اكثر من سياره بنفس المواصفات تقريباً وهني انحبطت .،

وهالمره تموا يتصلون لـ شخص شخص ، وكنت اسمع و الكل انكر علاقته ، رغم انه واحد منهم شكيت فيه ان هو اللي كاان موجود وشرد يومها .،

كل المحاولات كانت فاشله ، تقريباً فـ رجعت البيت ادعي ان يحصلونها واقدر اخذ حقي منهاا .، ونفس الوقت ادعي عليهاا

ثاني يوم ماداومت ماقدرت اداوم من القهر ، وما انكر ان شردتها اتعبتني لكن اتصلوبي من المركز قالوا لي ان التحريات راحوا للزميل الموظف "اللي قالي ماعرف بياناتها وخذي رقم السياره وبلغي"

والصدمه ان اعترف !
تخيلوا !

الصدمه .. عطاهم بياناتها وادعى انه سوا جيه عشان يصلح بيننا وان قصده الصلح !

وين الصلح يوم بتضيّع حقي ؟!!

فـ نظري اثبت انه شخص غير مسؤول ،
ويحلف لي كذب !

المهم .،

طلعت .....؟ ، لامواطنه ولا شي ويابوهاا !
اول مايابوها اتصلوبي ، خبروني انها مب مواطنه وانه مسكوها وانها قيد التحقيق .،

حمدت الله وشكرته .،

(ومااضااع حق من وراه مْطالب )

بس بعد للاسف !

يتبع .،

**اشراقة أمل** · 2015-05-24, 22:20

كفو والله اشتكيتي على المركز! في منهم مايستجيبون عن تجربه! ويماطلون

**نهار الظباء** · 2015-05-24, 23:01

جــزء 3

خذت ارقام الشهود ، وهم ٣ لان الباقين مثل مانوهت اجانب و اسيويين

وبالذات ركزت عاللي طلع وياي يوم كنت رايحه اخذ رقم السياره وهو ، وربيعه حضروا السب ، وشافوها يوم تدعي انها ؛
(مواطنه بنت لبلاد ، ومن ابسط حقوها
اخدمها كـ موظف خدمه )

يعني ماظلمتها الحمدلله .،

لين هنيه .. الشهود م عندهم مشكله يشهدون ، غير جيه ان المبنى فيه كذا كاميرا

المهـم ؛

عقب البلاغ و ثاني يوم بعد ما حصلوها ، يت وحده متغشيه اقولها : "تفضلي شو عندج" ؟!!

ترد علي بالاشاره .، يعني عشان ماعرفها من صوتها تاشر لي انه "اول خلصي عقب بقولج"

ايــوآآه !!!

شكيت انها هيه لكن سايرتهاا ، وسويت نفسي ماعرفهاا ، عقب استسلمت ..

لان المراجعين مب يايين يخلصون يطلع واحد و يدخلون عشره ، فـ رفعت الغشوه ، و قامت يتني

تصيح !! وتعترف بـ اللي سوته .، تعترف !

تطلب مني اسحب البلاغ ، بـ مقابل وهو انه :
( تحب ريولي قدام الموجودين )

قلت لها :

• اولا هالموجودين مب هم نفسهم اللي اهنتيني قدامهم واللي هنتيني جدامهم ماشافوا لاعتذار بالتالي انا اسفه هاتيهم ولج علي اني اوافق

• وثانياً تتوقعين لو شردتي فبلاد مثل هالبلاد مابيبونج ؟! ، تتوقعين مابيصيدونج فـ هالقضيه اللي تعتبر عليهم سهله ؟!

• ثالثاً وانا ابا القانون ياخذ مجراه "
قلت لها :

" فـ توكلي "

قالت :
" امي مريضه و انا بنزل احب ريولج وانتي روحي اسحبي البلاغ"

قلت لها : " اسفه انا بعد امي مريضه "

قالت : " توقعت ان فـ قلبج رحمه "

قلت لها : " كفايه ان من زود الرحمه اللي فقلبج يوم كنتي تهينيني بالفاظ قويه قدام ٢٠ مراجع كلهم رياييل وانا مضغوطه فالمعاملات ومع ذلك متحمله وساكته وماسبيتج وكان بامكاني ارد الاساءه بالمثل !؟؟ "

قالت " والحل؟! "

قلت " الحل خلي القانون يقول كلمته "

وطلعت روحت !

وكلت محامي ، وانكرت التهمه ، وتحول البلاغ للنياابه حضر اول جلسه وطلب اجل للدفاع
عنها

ونحن قدمنا نحن مذكره طالبين فيها " الاستماع لـ شهادة شهود لاثبات ، و طلب كاميرات المبنى"

وماكنت اعرف ان فـ اي يوم اقدر اندب الشهود للمحكمه ويشهدون برقم القضيه ، و المحامي مانبهني وقصّر وايد فهالشي ..

وتاجلت الجلسه .،

يتبع .،

**اشراقة أمل** · 2015-05-24, 23:19

تمام يااختي ... صارت ملحمه بس فيكي شجاعه ....

بس اختي مادامت تعذرت ... والناس الموجودين خلاص راحوا ماحد بيشهد على عقابها... كنتي اكتفيتي باخافتها وخلاص

مادامتوا حصلوها وبانت الأكاذيب ...

اكبر غلط اختي من الاداره مفروض المسؤول يوقف معاملاتها ويطلب منها في ذيك الساعه انها تعتذر امام الجميع

محتاج هو بعد بلاغ في الشرطه!

**نهار الظباء** · 2015-05-24, 23:56

• الشرطه استدعت واحد من الشهود وماحضر وقتها ماكنت محصله غير هالشاهد ، اللي حصلتهم وقت البلاغ عطيت ارقامهم للشرطه

• لما تحول البلاغ للنيابه. وقبل لايكون الحكم نهائي كنت محصله ارقام الباقين وحطيت ارقامهم واساميهم فالطلب و لاحياة لمن تنادي

• تلاقيت بـ الشاهد الاساسي فـ المحكمه وتمينا نسال كيف ممكن نوثق شهادته محد نفعنا كل حد يقولنا كلام وكل حد يطرشنا مكان عقب اضطر يرد لشغله

• الموظف اللي تستر عليها محد استدعاه لا فـ محضر الشرطه ولا فـ النيابه مع انه كذب ومتستر !

• الشهود لين هالفتره يالسين يتريون استدعاءهم للشهاده ومحد استدعاهم .. وفي منهم اللي قام يحس بالملل !

• المسكينه اللي معترفه ومستعده تحب ريولي عشان اتنازل حلفت قدام القاضي كذب وانكرت ، و محاميها استغل نقطه ان الشهود ماحد استدعاهم لصالحها ..

• القاضي مب مقتنع بالواقعه ولا مطمئن لكلامي امتثالا للحديث "ادرؤوا الحدود بالشبهات "

• جهة عملي للحين ما انصفتني بتفريغ كاميرات المبنى

• تقصير من جهة المحامي مالي و فرص فلتت من يده

و

" حكمت المحكمه حضورياً بتبرئة المتهمه من التهم المنسوبه اليها مع رفض الدعوى المدنيه
(التعويض المادي ) شكلاً "

الحكم كان براءه لعدم كفاية الادله ، والادله
محد خذ فيها اساساً

رحت المحكمه قالوا لي قدمي استئناف قدمت طلب لـ استئناف الحكم ، لما انعرض عليهم ورفضوه ، و ايدوا حكم البراءه وصار الحكم بات يعني نهائي برؤوها للاسف !

ليلتها دعيت ع كل من ضيع حقي ان الله يضيّعه مثل ماضيع حقي ، و يسلبه احب مايملك مثلما سلبني راحتي .، ومنو ماكان اللي ساعدها فـ براءتها ومنو ماكان اللي حرمني من حقي ماطافته ولابطوفه دعوتي .، ولا طافتهاا هيه ولا بتطوفها

لاني صرت في ضيق مستمر بالذات بعد الحكم

و لانه عقب الحكم بالبراءه ، مب قادره اداوم نهائيا و اتغيب و ينخصم من راتبي .، والكل ملاحظ غياب متكرر

صح انها انحكمت براءه لكن رحت استأنفت الشق المدني ( التعويض )

بالتالي
انفتح باب النزاع مره ثانيه فالمحكمه المدنيه (للتعويض)

كانت اول جلسه مطالبه بالتعويض تاريخ ٢١/٤/٢٠١٥ ، اعتقد فـ

حضر محاميها اللي فرحان بالبراءه .. وطاير
كانه ماخذ الدوري قال ؛
" حضرة القاضي نحن ماخذين براءه "

واقول فـ خاطري خذ البراءه واشبع بها ، و لك مني الدعاء وفعلاً ، وماخليت دعوه مادعيتها يومها عليه ، لانه واقف بالظلم ف وجه الحق ، وهي ما حضرت ، عن يصدر فـ حقها حكم

فـ طالبنها القاضي لـ جلسة ٣١/مايو الحالي

وبشوف شو يستوي فـ هالجلسه .،

وبحاول اثبت الواقعه الحين فـ مرحلة التعويض المدني المؤقت ، لو اثبتت الواقعه وانحكمت بالغرامه ، بيكون لي الحق بالتعويض المادي فـ يالسين نحاول نثبت الواقعه و الضرر

و حسبي الله ونعم الوكييل .،

بعد الجلسه بكمل من حيث لانه
الجلسه الاحد
٣١/٥/٢٠١٥

برد عليكن .، وقت ثاني

**Miss PiXy** · 2015-05-25, 00:27

كفو عليج ! لا تتنازلين استمري لين تاخذين حقج عشان تتادب وتكون عبره لغيرها

كل من هب دب قام يتجرا يغلط عالمواطن ويسرح ويمرح بالبلد ماخذ راحته

لمتى بنتم نسامح ونمشي لهم ؟؟

ان شاءالله تاخذين حقج منها مع ان اوقات مثل هذه ماتاخذ حقها ف المحاكم للاسف !

وبانتظارج

**Fa.R** · 2015-05-25, 00:40

أشكر فنج بنت ريال ونعم والله

إن شاء الله يارب تاخذين حقج عاجلاً غير آجل

**اشراقة أمل** · 2015-05-25, 01:35

اختي لا تتضايقين هي المشكله بالمحامي أتصور لو معينه واحد احسن منه يحتاج موضوعك ضغط على جهة العمل! يعني هم مب بكيفهم ينصفونك

هم لازم حد يضغط عليهم بصوره كبيره ويفرغوا الاشرطه .... وبلاغ عليهم بعد

والمتستر ارفعي عليه قضية بحالها تستر وراح يوافيك في المحكمه .... تحتاجين محامي احسن من هذا

وجهة العمل اختي الحاضرين الواقعة غصب عنهم يحضرون الجلسات اختي لان حسب علمي اذا ماتم استدعائهم وهم لم يستجيبوا أتصور

مره ناس خبرتني ان المحكمه تجيبهم بالغصب مادام الشهود معروفين والقضيه قائمه بس أتصور المشكله في المحامي

ثاني شي اختي كلمي العمل والعمال أتصور عندهم لائحة بحقوق الموظف في هذا المواقف .. ساليهم عن حقك في حال صاحب العمل

تم اهنتك في مقر العمل .... أتصور عندهم لوائح

والقضيه استمري ... الحرمه لازم بتكذب تحت أي قسم عشان تبري عمرها من الفضيحه بس الله موجود

**نهار الظباء** · 2015-05-25, 04:12

المشاركة الأصلية كتبت بواسطة حياة بائسة

اختي لا تتضايقين هي المشكله بالمحامي أتصور لو معينه واحد احسن منه يحتاج موضوعك ضغط على جهة العمل! يعني هم مب بكيفهم ينصفونك

هم لازم حد يضغط عليهم بصوره كبيره ويفرغوا الاشرطه .... وبلاغ عليهم بعد

والمتستر ارفعي عليه قضية بحالها تستر وراح يوافيك في المحكمه .... تحتاجين محامي احسن من هذا

وجهة العمل اختي الحاضرين الواقعة غصب عنهم يحضرون الجلسات اختي لان حسب علمي اذا ماتم استدعائهم وهم لم يستجيبوا أتصور

مره ناس خبرتني ان المحكمه تجيبهم بالغصب مادام الشهود معروفين والقضيه قائمه بس أتصور المشكله في المحامي

ثاني شي اختي كلمي العمل والعمال أتصور عندهم لائحة بحقوق الموظف في هذا المواقف .. ساليهم عن حقك في حال صاحب العمل

تم اهنتك في مقر العمل .... أتصور عندهم لوائح

والقضيه استمري ... الحرمه لازم بتكذب تحت أي قسم عشان تبري عمرها من الفضيحه بس الله موجود

صح كلامج خلل وتقصير من جهة المحامي وهذا
قلته و واضح رغم ان المكتب معروف ، بخصوص الشهود سمعت عن استدعاءهم بالغصب ومستغربه ليش محد اعلنهم ، ومصره الحين ع استدعاءهم واللي اعرفه فيه عقوبه الي يتخلف عن الحضور والدوام انا طالبه من المحكمه تطلب منهم الشريط عشان لو كان الامر رسمي افضل
اما هي وكيف انها حلفت ف وكلتها لله وهو يتكفل فيهاا
اما العمل و العمال ف هي للجهات الخاصه نحن حكوميين مانتبع
لوزارة العمل و العمال نتبع لوزارة الداخليه

اشكرج اختي لاهنتي

الموضوع: من يحمي الموظـف ؟! " رفعت قضيـه " وللاسف

أدوات الموضوع

عرض

من يحمي الموظـف ؟! " رفعت قضيـه " وللاسف

المزيد من آخر المواضيع من نفس القسم:

رد: من يحمي الموظـف ؟! " رفعت قضيـه " وللاسف

رد: من يحمي الموظـف ؟! " رفعت قضيـه " وللاسف

رد: من يحمي الموظـف ؟! " رفعت قضيـه " وللاسف

رد: من يحمي الموظـف ؟! " رفعت قضيـه " وللاسف

رد: من يحمي الموظـف ؟! " رفعت قضيـه " وللاسف

رد: من يحمي الموظـف ؟! " رفعت قضيـه " وللاسف

رد: من يحمي الموظـف ؟! " رفعت قضيـه " وللاسف

رد: من يحمي الموظـف ؟! " رفعت قضيـه " وللاسف

رد: من يحمي الموظـف ؟! " رفعت قضيـه " وللاسف

رد: من يحمي الموظـف ؟! " رفعت قضيـه " وللاسف

رد: من يحمي الموظـف ؟! " رفعت قضيـه " وللاسف

رد: من يحمي الموظـف ؟! " رفعت قضيـه " وللاسف

رد: من يحمي الموظـف ؟! " رفعت قضيـه " وللاسف

رد: من يحمي الموظـف ؟! " رفعت قضيـه " وللاسف

المواضيع المتشابهه

(زبونتي) تظل الملكة دوما.....مع أزياء """""""""المفنود """""""""

طلبية العضوه خفوق الشوق """""""""هديه رجاليه"""""""""

احلى مخاوير طبعه للعيد بارخص الاسعار"""""""""""""""

"""""""لبس هندي راااقي ينفع لليلة الحناء""""""""""