أنا والكوافيرة والماكييرة وقراري الأخير

[ياقوتةخضرا]

السلام عليكم ...


يوم يكون عندنا عرس في العايلة .. اضطر إني أحجز غرفة في الفندق عشان أوفـّـر وقت في التجهيز ..
وجرت العادة إني اتصل في كوافيرة وماكييره أعرفهم من زمان عشان أتعدّل في الفندق ..


مع الوقت حسيت انهم في كل مرة يزيدون عليّه السعر !!

الـ 500 درهم استوت 600 درهم
وبعدين نقزت الى 700 درهم
ومؤخرا استوت 800 درهم !!

اتخيلوا 800 درهم بس تسريحة و800 درهم مكياج للحرمة الوحدة !

ورغم اني أنا زبونتهم واتعامل وياهم من سنين !
المفروض ينزلون لي السعر وخاصة اني ما أكون بروحي
يعني نكون حوالي 4 أو 5 حريم !

آخر مرة كان عندنا عرس .. وأنا كنت محتارة شو اسوي بخصوص الكوافيره والماكييره !


فبالصدفة شفت ربيعتي في مناسبة .. تسريحتها مرتبة ومكياجها ناعم وخفيف
سألتها منوه سوالج عدولج ؟


قالت لي عن صالون عادي في بناية جديمة أنا أعرفه ، بس من سنين ما سرت له
وانهم يايبين عاملات يداد !

فسألتها عن السعر فقالت لي : تسريحة ومكياج 350 درهم !!!!!

يا بلاش !

وطلع الصالون بالصدفة عدال الفندق اللي بيكون فيه عرسنا .. تقريبا بيننا وبينهم شارعين ..

فقلت خلاص بأخليهم ييوني الفندق !


اتصلت بالصالون .. وخبرتهم عن الموعد واني أبغي كوافيرة ومكييره ييوني الفندق
فقالت لي : 1300 درهم !!!!!!

أول شي أنا اتحريت انها تقصد تبغي 1000 درهم زيادة عن سعر الشغل
وهالألف شاملة عددنا كلنا (كنا 3 أشخاص)

فقلت من حقها !

قالت : لا ! 1300 درهم عن كل وحدة !!!!!

يعني الصالون عدال الفندق .. السعر في الصالون 350 درهم وفي الفندق 1300 درهم ؟!!!

شي ما يدخل العقل !!

لا وبعد هم في بناية جديمة والإيجار أكيد ما ارتفع !


حسيت انه المسألة استغلال
واننا نحنا اللي فاتحين لهم مجال انهم يرفعون الأسعار بصورة مضحكة
فقلت لها خلاص ما دام الصالون عدال الفندق نحنا بنييكم !


اتصلت الفندق عشان أحجز ..
طلعت الغرفة 900 درهم والجونيور سويت 1200 درهم !!
يعني اتخيلوا ! الجناح أرخص من التسريحة والماكياج في الفندق !!


فقلت عيل بأدلّع عمري وبالسعر اللي كنت ناوية أييبهم به بأحجز لي جناح أحسن !

وقررت إني من اليوم ورايح : أسير الصالون وأوفـّـر على نفسي
ولا هالاستغلال غير المبرر !

المزيد من آخر المواضيع من نفس القسم:

• افضل طرق تثبيت المكياج في الصيف
• طريقة تطبيق محدد الشفاه
• طريقة تطبيق الكونسيلر كالمحترفين
• الفرق بين المكياج الاصلي والمكياج المغشوش
• طريقة تطبيق مكياج خفيف نهاري للجامعة
• طريقة تطبيق مكياج العيون الصغيرة
• افضل حيل واسرار مكياج لتبرزي جمالك
• افضل بدائل مزيل مكياج طبيعية وفعالة
• طريقة تطبيق مكياج صباحي ناعم وجذاب
• افضل حيل نحت الوجه بالمكياج

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[سامية22]

بالتوفيق بس اصابعج مامتساويه

[ياقوتةخضرا]

بالتوفيق بس اصابعج مامتساويه

طبعا حبيبتي سامية !
مثل ما في تاجرة أمينة في بعد تاجرة غير أمينة
وهذا ينطبق على كل المهن

الناس مب كلها واحد
بس انا حبيت اتكلم عن تجربتي الشخصية

انا اتمنى لكل كوافيرة وماكييره مخلصة التوفيق

بس انا حبيت أشوف حل جذري لمشكلة الارتفاع غير المبرر للاسعار
وخاصة انه الشغل هو نفسه !!

وعلى فكرة أنا دايما اشوف توقيعج ويعيبني شغلج وايد
وخاصة التسريحة الكيرلي

كل التوفيق عزيزتي سامية

[مون 55]

الله المستعان ........

[حور 123]

هذي المشكله يبالغون بالاسعار ونحن محتايين نضطر نوافق

وفي ماكييرات الله يسامحهن ويسامح البناات اللي يمدحن
بعد ماتحطين الميك اب الكحال سايح والفاونديشن سايح و الروج وصل لرقبتج

خخخخخخخخ
كل هذا وبعدنا مارحنا القاعه

والله المستعان

[ام لسانين!!!]

استغلال في استغلال

بالله عليج خبريني وين هالصالون اللي يعدل ب 350 !!!! اكيد مب فالعين !!!

في الصالون عندنا مكياج وتسريحه مب اقل عن 650 درهم هذا العادية

مكياج وتسريحة سبشل مب اقل عن 1000 درهم

عاد اذا قلتيلهم فالبيت حدث ولا حرج !!!

حتى الماكييرات اللي من برا العين انا مره اتصلت على وحده طلبت 3000 درهم !!!! تخيلي !!!

اللحين عندنا عرس وحاجزين وحده ب 1100 كانت قبل كم سنة ب 800 بعدين 900 بعدين 1100!!

وهاي اتيينا من الشارقة على ما اعتقد

[عبيرستايل]

الله يعين الجميع

[اغلى مواليفي]

انا اخر عرس سويت شعري الضحى فالصالون وكلفني 500 وبعدها سرت الفندق ويتنا الي تمكيجنا وكنا 3 وخذت على كل وحده 1200 ميكب بدوون تسريحه بس لانه صالون معرووف وراعيته معرووفه رغم ان مب هي الي بتمكيجنا وحده عندها وفوق ها تأخرت علينا ونزلت عرس اختي قبل العرووس بربع ساعه بس !
يعني الصرااحه لازم يكون في حل لاستغلال بعض الكوافيرات والماكيرات

[ناروتا]

اختي يا قوته انا مب ماكيره ولا ادافع عنهن ابدا
بس اعتقد لازم يكون فرق ما بين سعر الصالون والسعر يوم تيجيكي الماكيره الفندق
لا تنسين ان الماكيره مضطره تحمل كل ادواتها وتيجي لحد باب غرفتك بالفندق , يعني وقت وسيارة وبنزين وراتب للدريول الي الصالون يوفره, او بدل مواصلات لو تاكسي
فلازم يكون فرق في السعر ولكن مب فرق مبااااااالغ فيه مثل الأرقام الي ذكرتيها
وخل ببالك ان في بعض الحالات صاحبة الصالون يمكن ما تعرف عن هالأسعار , ويكون الاستغلال من العامله نفسها
يعني انتي بتدفعين للعامله الي تيجيك الفندق , صاحبة الصالون كيف بتعرف انتي كم دفعتي؟؟؟ وعليه انا اشوف يوم تتصلين عالصالون تكلمي مع صاحبة الصالون مب مع عامله هناك
ونقطه أخرى مهمه : يفترض ان كل صالون عندة قائمة أسعار مرخصة من جهة مسئولة , يوم الصالون يعطيكي سعر مبالغ فيه اطلبي تشوفين قائمة الأسعار

[jameela200]

تبون الصراحة ..
انا عن نفسي احاول ابروووحي اتعلم المكياج .. وما احب اروح الصوالين ابد ..
مكياج خفيف وسشوار وخلاص .. جدا تعبت منهم .. افلوسنا غالية علينا ومحتاجينها ..
4 ساعات وكل شي يختفي ..
دخلي اليتيوب والله تسرحات عجيييبة انا تعلمت كم تسرحة لو تشوفينها بتقولون هاي صعبة وايد بس والله لو تشوفون الطريقة تنصدمون ..
بتعلم وبعلم خواتي وبنات خواتي بعد .. احسن من المصخرة اللي صايرة ...
3000 بفصل لي فستان .. ابرك لي
او بحجز لي فندق راقي يومين
او بشتري لي ذهب .. سوارة
او او او .. صح كلامي وله ؟

[امراه]

عيل فالعيد روحي شوفي الاسعار فالصالون ولابرع اصالون هاذا غير المعامله الخايسه من بعض الصوالين

[كل الرقة]

انا عن نفسي خلاص تبت والحمدلله
كنت ادفع بالهبل والمشكله انه مب حلو ابداااا

في البدايه صح مثل ما قلتي المبلغ تضاعف ,,, تخيلي مكاييره مشهوره اسوي عندها اكثر من مره وحجزت عندها لانها تعرفني واتفقنا ع السعر
بعد شهر يتني وسوت لي وطلبت علي مبلغ خيالي غير عن السعر ويوم قلت الها ضحكت وقالت مستحيل انا ايي بهالمبلغ بس واضطريت اني ادفع المبلف كامل وانا كلي قهر على شكلي الي يفشل مب ع الفلوس,,,,
حاليا انا اتمكيج بروحي لاني ادفع لالاف ع مكياجي وعندي كل شي متوفر ومن افضل الماركات ولا ارضى بالاستغلال... واتصل في فلبينيه اعرفها تسوي لي سشوار او رول او شي بسيط وتساعدني اذا بركب رموش لاني كنت ما اعرف بروحي بس تعلمت الحمدلله
والنهايه لوك جميل وناعم وروعه ع ذوقي وما يكلفني اكثر من 200 درهم

كل بنت لازم تتعلم تسوي لعمرها وتتدرب وتشتري مكياج حقها يدوم ولا تدفع حق مكياج ساعه عن المكييرات هذا رايي واتمنى من الماكيراات ما يهاجوني لانه نابع من تجربة شخصية

والحمدلله مرتاحه حاليا وخلاااااص مستحيل اغير رايي

[jumana]

شي طبيعي يكون فرق فالسعر بس هم الله يهديهم يبالغون واايد ويستغلون

[مبتسمةمتفائلة]

و الله انا لو بفتح صالون بمكيج 2 و اسكر المحل و انام طول اليوم فلبيت هههههههه

[ورقة ناعمة]

انا كنت اتعامل مع وحده تينا للقاعة بس بعد فترة حسيت ميكبها نفس الشي وعادي

ربيعتي دلتني على صالون حلو يسوون ميكب بس تسريحاتهم مب شي جربت وسرت سويت بملجة ربيعتي والكل يسال وتخبل عالميكب ,,,

بس انا من النوع اللي امل من نفس الماكيرة احب التغيير