معتقد خاطىء ..ساعدوووني

**ஐترف الصباஐ** · 2007-09-13, 00:28

السلام عليكم ورحمة الله وبركاته

.
.
في البدايه حابه ابارك للجميع شهر رمضان والله يجعلنا من صوامه القوامين ومن عتقائه يارب
.
.
بخبركم شي صارلي الليله ..كنت اتابع النقل المباشر لصلاة التراويح من مكه المكرمه..ومرت علي الخدامه (فليبينيه) وهي مسلمه فقلتلها تعالي تابعي معاي ويلست اخبرها هذي الكعبه وان الكل اللي اتشوفهم مسلمين وفيه منهن اقليات ماتعرف تتكلم عربي وان اللي جامعنهم هو توحيدهم لرب العالمين .. انا مب داعيه بس حبيت انها تحس بلذة رمضان..المهم انها قالتلي فكره سائده عندهم ..استغربت واااااااااااايد منها ..فكره غلط ×غلط
.
.
هن في الفلبين يعتقدن انهن غير ملزومات بالحجاب والصلاه واي شعائر دينيه الا اذا هي وصلت الكعبه وقبلتها ..من هذا اليوم اللي توصل فيه مكه يكون ملزوم عليها تتحجب وتلبس ملابس محتشمه اما قبل كذا لاااا !! من هذا اليوم ياويلها لو حد يشوف شعرها ..يلومونها لو تلبس مثل ماكانت تلبس قبل اليوم اللي قبلت فيه الكعبه..
.
.
وسالتني ..قالت بما معناه ..ان احنه عندنا فلوس واااايد ورحنا مكه وكلنا اتحجبنا لهذا السبب << تقصد الغشوه والعبايه اللي نلبسهن!!!! وقالت انتي تخلعين بس عند زوجج وغير كذا متغطيه ..فقلتلها مب شرط اني رحت مكه (انا رحت ولله الحمد) ويلست اعددلها اسامي قرايبنا اللي ماراحن مكه وهن متغطيات
.
.
وسألتها انتي رحتي مكه ؟ قالت لا .. قالت انا اريد ارجع والبس قصير وافتح شعري (هي عندي تلبس جلابيه وشيلة صلاه ) اول ماوصلتني كانت لابسه حجاب قصير وقميص وبنطلون جنز ..وقلت احتمال ماعندها ملابس محتشمه فخذتلها جلابيات وشيال صلاه ..
المهم قلتلها انتي الحين متحجبه وحجابج حلو..
قالت انتي حجبتيني !! انا في بلادي مااتحجب والبس بدي كت وبنطلون لاني مارحت مكه..
فقلت يعني الحين لو وحده مسلمه منكم مالقت فلوس اتروح مكه ..شووو تسوي ؟؟ تبقى طول عمرها لاحجاب ولاصلاه وصيام ؟ قالت يس !!
قلتلها الحين بنتج (بنتها عمرها 15 سنه) قلتلها بنتج الحين ماتصلي ؟؟ قالت يس ..فقلتلها هذا حرام ..شروط انج اتكونين مسلمه والله يدخلج الجنه ..انج تحتشمين وتصلين وتصومين وماتختلطين بالرجال حتى لو مارحتي مكه ..قلتلها ان الله هو ربنا مب مكه..ولازم تتصلين في بنتج اتخبرينها هذا الشي ..بس هي للحين مب مقتنعه ..هي اتصلي لاني اقولها صلي ..وتحتشم لاني انا حجبتها ..والله شي يحز في النفس ..حسبت ان كل هالاشيا من نفسها ومن قناعتها ..
.
.
طلبي منكم بنات اي وحده عندها فكره او اقتراح او اي شي يساعد اني اقنعها ..اتضيفه في هالصفحه ..
وممكن من اللي عندها مواقع اتبيع كتب اسلاميه بلغتها ..اتضيفه لي ..لاني الاقي باللغه الانجليزيه وهي ثقافتها مب لين هناك ..حتى اللي تقدر اتوصل هذي النقطه لاي داعيه ممكن يعدل هالفكره ..انا حاولت ماعرفت ..
.
.
حرام تيلس عندي سنتين وترجع بنفس الفكره
.
.
لو الله هداها يمكن هي تهدي عايلتها وقرايبها (هي ام لست عيال +امها وابوها وزوجها وخواتها وصديقاتها) احتمال كل فرد فيهم يقنع الناس اللي حواليه ..
.
.
والله كنز يابنات ..اجر عظيم (والدال على الخير كفاعله)
.
.
همتكن يابنات
.
.
واعتذر عن الاطاله
.
.

المزيد من آخر المواضيع من نفس القسم:

**الرزينـــــــه** · 2007-09-13, 00:43

الله يهديها يا رب ..

**سـد اللـيل ـيم** · 2007-09-13, 01:10

عزيزتي في مكتبة في الخالديه اذا كنتي من بوظبي يبيعون كتب اسلاميه بلغات العالم وعندج بعد في الاتحاد النسائي فصول لتدريس المسلمين الجدد ان شاء الله تستفيد منهن

**ஐترف الصباஐ** · 2007-09-13, 01:12

االرزينه ..تسلمين ع المرور والدعوه ..
.
.
حشمتي .. انا بعيده وااايد عن العين وحتى بعيده عن بوظبي
.
.
انا في الغربيه ^_^ لذلك طلبت مواقع اشتري منها
.
.
وتسلمين ع المرور

**هز الرحيل** · 2007-09-13, 01:40

الله يهديها وحاولي معاها لج الأجر

**وســـما** · 2007-09-13, 01:49

في المكاتب بتحصليين كتب عن الاسلام و بتحصلينهن بكل اللغات ..

وحده تقربلي .. بشكارتها فلبينية مب مسلمه .. و ماشاء الله يلست تقنعها بالاسلام و اشترتلها كتب .. لين ما دخلت الاسلام بقناعة ....

**ஐترف الصباஐ** · 2007-09-13, 03:10

.. يسلمووووو على المرور العطر ..
.
.
وراها وراها لين ماتقتنع خخخخخخ
.
.
في انتظار باقي الاخوات

**صغيرة** · 2007-09-13, 03:46

اختي ماشي حل الا تكلم بشكارتنا الفليبنية اسلمت عندنا والحين اشوفها ماشالله داعية لاني الحمدلله علمناها كيف ترد على مشككين اذا بغيتي تفهمها بعطيج رقمها عشان ترمسها وتفهمها وبخبرها اذا وافقتي .........
او تعطينها كتب دينية بلغتهم

**ام منيرة** · 2007-09-13, 04:13

اختي عندنا مكتبة تبيع كتب اسلامية بكل اللغات و قرآن مترجم بعد عطيني صندوق بريدج وانا بطرش لج الكتب .
والله يهديها..

**ஐترف الصباஐ** · 2007-09-13, 04:13

هلا اختي صغيره
.
.
ارسليلي رقمها على الخاص وبخليها اتكلمها وانشالله تنهدى
.
.
والف شكر

**ஐترف الصباஐ** · 2007-09-13, 04:15

ام منيرة باخذلج رقم صندوق البريد من ريلي
.
.
وبردلج خبر
.
.
وتسلميييييييييين الله يكثر من امثالج

**ام منيرة** · 2007-09-13, 04:45

الله يسلمج انتظر ردج...

**أموري** · 2007-09-13, 05:11

ان شاء الله بدور لج ولو حصلت بطرش لج اياهم لباب بيتج

**twinkle** · 2007-09-13, 14:39

والله ما عندي أي فكره حاليا بس أدعيلها ان الله يهديها ويثبت قلبها على الايمان

* أم أحمد · 2007-09-13, 20:51

الله يهديها ويهدي الجميع

الموضوع: معتقد خاطىء ..ساعدوووني

أدوات الموضوع

عرض

معتقد خاطىء ..ساعدوووني

المزيد من آخر المواضيع من نفس القسم:

المواضيع المتشابهه

سلوك خاطىء نتج عنه عملية جراحية لمعلمة

سجود خاطىء

ممكن يكون اختبار الحمل خاطىء

على معتقد وايدد منا يصيبها هاي المرض طريقة مضمونة للعلاج 1000000000000%