ولد ولا بنت كلهم من الله

[جنوني حكايه]

السلام عليكم

مادري كتابتي لهالموضوع مواساة لنفسي ولا اعتراض على عقليات فالمجتمع .... الحمدلله أنا حامل وعندي قبل بنتين ربي يطرح فيهن البركة ... المهم من حملت وانا حاسه ان فيني ولد..... سويت سونار وطلعت بنوته استغفر الله تضايقت وحسيت غير وعقبها تميت افكر بردود الناس وأهلي وأهل ريلي تخيلوا حتى شوي وبصيح استغفر الله ! ليش كلام الناس يهمنا وليش الناس يفرون كلام ومايحاسبون ليش هالنظرة للبنت وليش يستأنسون بالولد كلهم عطايا الرب وانا لولا احساسي انه ولد ماكنت يضايق بس لأني عشمت نفسي وايد وبالأخر انصدمت ' أكيد الحين بينغزوني فالرمسه وانا من النوع اللي يتاثر حتى لو اعرف ان اللي قدامي يبى ينرفزني اتنرفز وما أيود أعصابي ' استغفر الله ادري احساسي غلط والمفروض احمد ربي هذي نعمة وغيري مب لاقي الحمدلله الف مره وان شالله الحمله اليايه ولد ولو لا اللي عقبها ههههههههههه المهم حبوبات تنصحوني كيف ماحس بهالاحساس الخايس وكيف ارد عليهم

المزيد من آخر المواضيع من نفس القسم:

• روتين العناية بالبشرة بعد الولادة
• افضل خضروات مفيده للحامل
• اسباب تغير لون البول اثناء الحمل
• كل ما تحتاجين لمعرفته عن اكتئاب بعد الولادة
• افضل طرق علاج حرقة المعدة اثناء الحمل
• اسباب وطرق علاج الامساك اثناء الحمل
• ابرز اعراض الحمل في اول اسبوع
• افضل طرق علاج غثيان الصباح اثناء الحمل
• اهم اعراض نقص الحديد اثناء الحمل وافضل طرق...
• تقرير شامل عن ارتفاع ضغط الدم اثناء الحمل

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[عشق طاهر]

حبيبتي

اقري هالقصه


كان في بنت مدرسة في غاية الجمال سألوها المدرسات ليش انتي مو مزوجه وانتي تملكي كل هذا الجمال قالت باقول لكم قصة كان في وحدة كانت تنجب دايما بنات ولما جابت البنت الرابعة غضب والدها غضبا شديدا واخذ البنت زورا من والدتها ووضعها عند باب أحد المساجد وكان الام تدعو بأن يحفظ لها ابنتها ويرجعها لها ويذهب الاب إلى المسجد فوجد الفتاه في مكانها لم يأخذها أحد وكرر هذه العملية اليوم اللي بعده ولم يأخذها أحد وأرجعها لوالدتها ورزقه الله بعد ذلك ةلدين وتوفيت الام وتزوجت بناته وأبنائه الا هذه البنت قامت ترعي والدها لكبر سنه وعدم مقدرته على الحركة وهؤلاء الاولاد الذي كان يتمناهم كانوا يزورونه كل شهرين مره هل تعلمون من هذه الفتاه انها أنا؟؟؟؟؟؟؟؟؟؟؟ فانا لا الزواج وترك والدي وحده.



و قولي للي ينغزونج

الولد باجر بتاخذه حرمه بتنسيه حليب امه
يعني تكبره و تربيه وتتعب عليه و يعرس و يرتبط ببيته وحرمته وعياله و يالله بالسنه احسنه يزور الام


اما البنت
لو عرست لازم تزور امها
و فالنفاس تتم عند امها
مرضت تروح لامها
عيالها صار لهم شي
تروح للام

ولو ما تروح للام
تتصل وتكون امها هي مرجعها الاول بالحياه


والدنيا بدون بنات مالها طعم

انا بجري بنت ويوم ريلي يقول شدي حيلج وهاتي اخو لبنتنا
اقوله خلني اصف لك بنات واشبع منهم
عقب بفكر بالولد~> ع اساس ع كيفي يعني
بالاول والاخير هذا رزق من الله

و تفكير ايام الجاهليه بصراحه

[Śŏ ČĻĂŜşŷ]

حبيبتي العيال رزق من ربي العالمين لا تحطين فخاطرج و ان شاء الله ربي برزقج بولد

[Dubai designer]

شوفي اختي حبيبتي فعلا مثل ما قلتي غيرج ادور هاي النعمة تعمة الذرية وما تشرط انها اتيب بنت أو ولد .. أنا مثلا اتأخرت عن الحمل 5 سنوات ونص ودوم كنت ادعي الله سبحانه بنت أو ولد الحمدلله أهم شي احس بنعمة الامومة اتخيلي ساعات وانا اصيح كنت ادعي اني على الاقل أحمل وأعق بس عسب احس بطعم الحمل والامومة والحمدلله بعد الصبر والتوكل على الله والتفاؤل والاستغفار قبل العلاج طبعا ربي عطاني ولدي وبنتي فديتهم الله يحفظهم لي ان شاء الله
تدرين يدتي عندها 6 أولاد ماشاء الله وبنتين .. وهي في هالعمر الحرج محد يجابلها غير بناتها والاولاد لاهين بزوجاتهم ومشاغلهم وعيالهم .. وعماتي لو انهم ماشاء الله يدات الحين وعندهم مشاغل الدنيا الا انهن يجابلونها يوميا !
اللهم لا اعتراض بس صدقيني في الكبر بتشوفين قدرج اشكبره عند البنات .. الله يخليهم كلهم ويهديهم لنا ويخليهم لنا نعم السند والونيس

[الشحية غير]

ياختي حاولي اطنشين كلام الناس و بعدين الله العالم شو في الارحام مب بايدنا
والبنات رحمة من الله
انا احب البنات اموت فيهم
عقول الناس متخلفه لليفكرون ب هالطريقه
الله يقومج بالسلامة ان شاء الله

[سديموو]

شحلاتهم البنات ولاتفكرين بالعكس في حديث بما معناه انه الي يجيه ثلاث بنات ويربيهم تربيه صالحه يدخل الجنه
واعرف وايدين وأمي منهم ثلاث بنات عقب يابت الأولاد حتى ربيعتي ثلاث بنات والحين يابت ولد ورآهم والله يرزقج بالخلقة التامه اهم شي

[مالتيزرس]

صدق أنا مستغربة ممن هالنظرة المتشائمة للبنات ماعرف ليش؟
حتى أنا يوم كنت حامل فبنتي الوالدة الله يطول فعمرها تسألني تقولي شٌٌٌـٌٌٌٌـٌٌٌـــSHOـــٌٌٌــٌٌٌٌوٌٌٌ قالت لج الدكتورة أقولها بنت أحسها مافرحت الفرحة اللهي ولد. يوم سألتها قالت لي أونه غير الوحدة يوم تيجر فولد ترفع الراية من وهالكلام مال الكبار. بالرغم انها مبجرة فبنتين. الواحد يقول ﺂلـّבﻤډٌللـّہ ' كلهم نعمة. والبنت بركة البيت

[ملكة الاحاسيس]

شوفي في شي حلو بالموضوع بتعرفين فعلااااا منو الي يحب لج الخير ومنو الي يكرهج بموضوع خلفة ولد او بنت
انا انصدمت بناس وايدين لمجرد انه يبت بنتي 3 انواع الشماته
سبحان الله وربي اخذ حقي منهم اللهم لاشماته ..
شوفي حبوبة حملج بيخليج حساسه ومابي السعج بالرمسة ههههه
عمر الولد والبنت ماكانو كرت ضمان لاي حرمه اللهم انهم احلىهدية ربانيه للزوجين
ان اقتنعتي بهديه ربج واختياره عشتي سعيده
ماقتنعتي صدقيني مارح تسعدين ولاريلج بيحس بسعاده
اعترف كنت مثلج ومثل اي وحده اتمنى ولد عقب بنتين
وخلفت ويتني الثالثه الحمدلله والله مازاد زوجي الا حب وعشق ولك الحمد يارب
ولاااااا عمره استسلم لافكار الجهله .

فيه نوعين من انواع الرمسة بتسمعينها اهلج لنه خاطرهم يفرحون لج هذول ماعلبه قلبهم عليج
ورمسة الحريم الي فيها ان وان
هذول اعطيهن كاش ولاتخلين الرمسة بقلبج .. ردي ولاتستحين دام مايستحون انه يتفلسفون بهدية رب العالمين

[ظبيانيه ستايل]

انا اهلي بموووتون ع البنات ويفرحون بالبنت اكثر عن الولد حمدللهً وبعدين هذا رزقج من الله افرحي فيه ولاتهتمين فكلام حد افرررررحي وفرحي ريلج واحمدي الله ناس يتمنون حد ولد ولابنت والله حلوين البنات الله يخليهم لكم

[ام*الحلا*]

اختى اكبر رد على اللي يقصد يضايقك بكلامه انك اوول شي ما تبينيلو انك اتضايقتي ... والرد اللي يسكت اي وحدة لو شو ما قالت انك تقولي انا الحمدلله راضية بهدية ربي لو شو ما كانت ... ردي هالرد وانتى مبتسمة ومو متضايقة وشوفي كيف تسكتي اللي بدو يضايقك .. اما الام والاهل اللي يحبوكي عن جد هدول ما تاخدي ردة فعلهم بحساسية ... متل ما قالت وحدة من الخوات هم "بسبة نظرة المجتمع" بس يتمنولك الخير .... وربي يطرح البركة في اولادنا .. بنات كانو او صبيان

[سماء المحبة]

حبيبتي الله يرزق البنين و الأولاد و بني ادم ما داموا للحين في الجاهلية الاولى واللي تيب البنت باكر أتيب الولد و العكس كذلك و عليج بالدعاء و الله كريم ما يتسى عباده و اني عندي بنوتة و الثانية بالطريج وربي كريم و الله احبهم و يحميهم من كل شر يا رب و ياكم أجمعين،،

[افناان]

البنت تنفع اكثر من الولد
شوفي حواليج حبيبتي من اللي يحاتي هله و يفكر فيهم و يشيل همهم ؟؟
البنات طبعا اكثر
الله يتمم حملج ع خير

[يحـــــ ام يى]

يا حلو البنات وجمعتهم اذا كبروا بتحسين فيهم وربي بيرزقج بالولد ان شاء الله لكن اصبري وربيهم تربية صالحة

[شما الهاجري]

الله يجعل فيها البركة ويرزقج بالولد الصالح

[:: DUBAI ::]

قوليلهم أنا احب البنات و مستانسه بعطايا ربي ..

^^

بالعكس البنات جنه .. هم اللي يعابلون البيت و الام و الابو .. الولد يطلع و يسهر مع ربعه .. بس البنت اللي تكون حنونه على الكل ..