قصتــــي مع النحافــــة ... تعالو بقولكم سري!
السلام عليكم ورحمة الله وبركاته
عزيزاتي وخواتي سيدات الامارات
الى كل بنت نحيفة وتبحث عن زيادة الوزن وليس السمنه (بالعامية دبه)
هاي قصتي من عهدي بالنحافه << عمرها ما كانت دبه هههههه
طولي 151 تقريبا ووزني كان ما يتعدي الـ39 كنت دايما 38 واللي يشوفني يقول هيكل عظمي
كنت اكل كل شي حتى تمر وحليب كلته صيف كامل ماشي تغير غير نص كيلو زدته
ويهي اصفر شعري خف وفروتي تبين من كثر ما طاح شعري وخف احيانا احس بدوخه خفيفه واذا مشيت على دري قلبي يسوي عرس يقرقع داخلي
وتعبت من كثر ماقالو لي انتي ليش ضعيفه ليش ماتاكلين مع اني كنت اكل عن 2 احيانا بس مايبين فيني شي
اللي سويته اني سرت مركز امبريال كولدج لندن للسكري وسويت فحص شامل الله لا يراويكم شو طلع فيني
الدكتورة انصدمت كل شي ناااااااااااازل فقر دم نقص فيتامين د وكالسيوم ونقص فيتامينات الجسم بشكل عام وهذا السبب اللي خلاني ضعيفه
قالت لي انتي جلد على عظم عطتني فوليك اسيد حق الدم وفيتامين د وفيتامين د مع كالسيوم وفيتامينات متعدده
بعد ما خذتهم ردت صحتي الحمدالله وطنشت وزني لين رد بروحه ماشاء الله ماشاء الله زدت 10 كيلو احين وزني 50 الحمدالله
قريب اكمل سنه من بديت اتعالج عندهم مواعيدي كل 3 شهور واخر مرة شهر 12 قالت لي كل شي تمام ووقفت الادوية
وشعري رد وطلع بفضل الله من اول ما بديت العلاج
ماغيرت اكلي بس ودرت البيبسي اللي كنت مدمنه عليه وصرت اشرب ماي وايد
اللي ابيه تستفيدون منه انكم اذا كنتو تاكلون كل شي ومايبين فيكم تسيرون اي عياده او اي مستشفى وتسون فحص شامل بس عشان تتاكدون ان كل شي طبيعي فيكم
الفحص بسيط بس دم وطول ووزن وانتو بكرامه بول
وان شاء الله ماعليكم الا العافية والله يبلغكم الوزن المثالي اللي تبونه
قولو ماشاء الله واذكرو الله
طولت عليكم وقلت لكم قصة حياتي هههههه
ادعولي الله يوفقني و يرزقني من واسع فضله